NATO shton trupat në Kosovë/ Stoltenberg: Sulmi i 24 shtatorit i papranueshëm

Sekretari i Përgjithshëm i NATO-s, Jens Stoltenberg, tha se shtimi i pranisë ushtarake në Kosovë me 1.000 trupa – që përbën vendosjen më të madhe në vitet e fundit të aleancës – tregon se sa seriozisht e merr aleanca dhunën që shpërtheu muajve të fundit në Kosovë.

Në një konferencë për media me presidenten e Kosovës, Vjosa Osmani, teksa u pyet nëse ka pasur ndikim rus në javët e fundit, përsa i përket incidenteve në veri dhe nëse NATO është e shqetësuar se incidente të ngjashme mund të shkaktojnë një konflikt më të gjerë, Stoltenberg tha se NATO ka investuar shumë për paqe dhe stabilitet në Kosovë dhe në rajon që nga vitet ’90.

Ai gjithashtu shtoi se NATO do të zbatojë mandatin e misionit të tij në Kosovë, KFOR, për të ofruar mjedis dhe lëvizje për të gjitha komunitetet. Shefi i NATO-s tha edhe se aleanca është duke kryer një shqyrtim të pranisë ushtarake në Ballkanin Perëndimor “që përfshin Bosnje e Hercegovinën dhe po ashtu Kosovën”.

Duke folur për sulmin ndaj Policisë së Kosovës më 24 shtator në Banjskë të Zveçanit nga një grup i serbëve të armatosur, Stoltenberg tha se përgjegjësit për sulmin duhet të përballen me drejtësinë dhe theksoi se këtë mesazh do ta përcjellë edhe gjatë takimeve që do të zhvillojë më 21 nëntor në Beograd.

“Në shtator pamë një shpërthim serioz të dhunës në veri të Kosovës, që rriti shqetësimet se një konflikt i gjerë mund të rikthehej në Ballkanin Perëndimor. Në maj, trupat tanë të KFOR-it u sulmuan, me ç’rast u plagosën 93 ushtarë, disa rëndë, disa me plagë të përjetshme. Sulme të tilla të dhunshme janë të papranueshme. Përgjegjësit duhet të përballen me drejtësinë” – theksoi shefi i NATO-s.

Para se të vizitonte Kosovën, Stoltenberg qëndroi në Bosnje e Hercegovinë, ku u takua me krerët shtetërorë dhe përfaqësuesin e lartë ndërkombëtar, Christian Schmidt.

Në Sarajevë shefi i NATO-s tha se aleanca është e shqetësuar me retorikën e ndarjes dhe me ndikimin rus në rajon dhe porositi që të gjithë të përkushtohen për sigurinë dhe stabilitetin në rajon, duke shtuar se aleatët “e mbështesin fuqishëm sovranitetin dhe integritetin territorial të Bosnjë e Hercegovinës”.

Vizita e Stoltenbergut në rajon vjen mes paralajmërimeve nga Ukraina se Rusia synon të nxisë konflikt mes shteteve të Ballkanit Perëndimor. Për synimin e Rusisë që të nxisë konflikte në rajon, ka folur më 19 nëntor edhe kryeministri i Kosovës, Albin Kurti. Ai tha se Moska dëshiron të ndezë “një vatër krize në oborrin e Bashkimit Evropian” me qëllim që “ta shpërqendrojë NATO-n”.

Pas Kosovës, shefi i NATO-s më 21 nëntor do të qëndrojë në Serbi, ku është paraparë të takohet me presidentin serb, Aleksandër Vuçiç.  Po në të njëjtën ditë, ai do të vizitojë Maqedoninë e Veriut, shtet anëtar i NATO-s, ku do të takohet me krerët shtetërorë.

Më 22 nëntor Stoltenberg do të përmbyllë turneun ballkanik me një takim me liderët e shteteve anëtare të NATO-s nga rajoni, me kryeministrin Edi Rama, presidentin kroat, Zoran Millatoviç, kryeministrin e Malit të Zi, Millojko Spajiç dhe me atë të Sllovenisë, Robert Golob.