Në heshtje dhe sekret…KOSOVA futet në NATO, hapen dyert…

Ish-ambasadorja e Serbisë në OSBE, Branka Latinoviç, tha se vendimi i Komitetit Drejtues të Asamblesë Parlamentare të NATO-s për ngritjen e statusit të Kosovës në nivelin e anëtarit të asociuar, është një “proces i qetë që lë të kuptohet se Aleanca është e gatshme të hapi dyert për Kosovën”.

Latinoviç theksoi se është ironi e madhe që kjo po ndodh pikërisht me rastin e 25 vjetorit të fillimit të bombardimeve të Jugosllavisë së atëhershme, gjegjësisht Serbisë dhe Malit të Zi, dhe ky nuk është një mesazh aspak i këndshëm, duke pasur parasysh atë që ndodhi dhe cila ishte arsyeja.

“Kjo përkon me atë që dëgjojmë nga deklaratat e zyrtarëve, përfshirë polemikat e fundit mes ambasadorëve amerikanë në Prishtinë dhe Beograd, se kush është më afër NATO-s, se çfarë cilësie bashkëpunimi po zhvillohet. Ky është një proces i heshtur, që lë të kuptohet se Aleanca është e gatshme t’i hapë derën Kosovës sa më shumë që të jetë e mundur dhe në këtë kontekst edhe formimin e ushtrisë, duke e armatosur Kosovën me disa lloje armësh, dhe që të gjitha janë në përputhje me atë që është përcaktuar nga Plani i Ahtisarit” – theksoi Latinoviç.

Megjithatë, ajo kujtoi se gjërat që po ndodhin në fushë, janë në një mënyrë aspak të këndshme për Serbinë.

“Jo vetëm që nuk është e këndshme, por nuk është edhe e mirë nga pikëpamja e sigurisë. Nuk mendoj se anëtarësimi do ndodhë në një të ardhme të afërt, por po hapet një proces që mund të diversifikojë në mënyrë adekuate dhe të mundësojë një tjetër cilësi të pjesëmarrjes në Aleancë, sepse siç po shohim, kjo nënkupton rritjen e cilësisë së pranisë së delegacioneve të parlamentarëve të Kosovës në Asamblenë Parlamentare të NATO-s dhe në këtë mënyrë, duke mundësuar që të ketë një nivel më të lartë dhe më të mirë të pjesëmarrjes në agjendën e Aleancës Veriatlantike” – potencoi ish ambasadorja serbe në OSBE.

Kujtojmë se më herët, për nënkryetaren e Forumit për Marrëdhënie Ndërkombëtare, Branka Latinoviç, vendimi i Spanjës për njohjen e pasaportave të Kosovës nuk ishte befasi dhe tregon se nuk duhet të lidhet me faktin se kjo lëvizje pasoi vetëm pak ditë pas njoftimit nga Ministri i Jashtëm Britanik, David Cameron, se Londra do ta ndihmonte Prishtinën për të marrë njohje të reja.

Ajo u shpreh se duhet pasur parasysh që zyrtarët spanjollë kanë qenë të qartë se ky akt nuk duhet të lidhet me njohjen e Kosovës dhe se kjo në asnjë mënyrë nuk e vë në pikëpyetje qëndrimin spanjoll.

Kur është fjala për politikën e Britanisë së Madhe, Latinoviç theksoi se pas daljes nga Bashkimi Europian, aftësia e Londrës për të vepruar drejtpërdrejt përmes atij forumi është zvogëluar, por mund ta bëjë këtë përmes NATO-s, pasi, përveç Qipros, të gjitha shtetet e tjera të Bashkimit që nuk e kanë njohur ende Kosovën, janë anëtare te Aleancës.

Sipas saj, deklarata e Cameron duhet të lidhet edhe me situatën e brendshme në Serbi.

E pyetur nëse pret rritje të presionit ndaj pesëshes europiane – Spanjës, Greqisë, Sllovakisë, Rumanisë dhe Qipros – për të ndryshuar qëndrim ndaj kosovës, dhe nëse këto presione do të vijnë nga Britania e Madhe, e cila sipas disa interpretimeve synon të marrë “stafetën” kur bëhet fjalë për dialogun ndërmjet Beogradit dhe Prishtinës nga BE-ja dhe SHBA-ja, duke qenë se ky është vit zgjedhor për ta, nënkryetarja e Forumit për Marrëdhënie Ndërkombëtare, Branka Latinoviç, tha se është – “vlerësim i mirë dhe tezë e mirë”.