Negociatat në Gjenevë bllokohen te Donbassi dhe NATO: Zelensky dhe Trump pritet të përfshihen drejtpërdrejt

Bisedimet mes delegacioneve të Ukrainës dhe Shteteve të Bashkuara në Gjenevë kanë hasur në dy pengesa madhore, sipas burimeve të mediave ukrainase: tërheqja e Forcave të Armatosura të Ukrainës nga Donbassi dhe e ardhmja e anëtarësimit të Kievit në NATO.

Të dyja çështjet janë konsideruar aq të ndjeshme, sa burimet pohojnë se ato tashmë janë ngritur në nivel presidencial. Presidenti Volodymyr Zelensky dhe Presidenti Donald Trump mund të ulen në tryezë për t’i trajtuar personalisht – potencialisht brenda kësaj jave ose të ardhshme.

Sipas raportimeve, plani i Trump-it parashikon tërheqjen e trupave ukrainase nga Donbassi, një kërkesë që burimet e përshkruajnë si “ndër pikat më të kontestuara” të draft-marrëveshjes. Ky kusht shihet në Kiev si lëshimi më i madh territorial që do të kërkohej në kuadër të negociatave.

Megjithatë, pavarësisht ngërçeve, palët kanë bërë përparim në një sërë çështjesh të tjera. Sipas RBC-Ukraine, është arritur harmonizimi i disa pozicioneve që lidhen me:

• Madhësinë e Forcave të Armatosura të Ukrainës,
• Kontrollin mbi Termocentralin Bërthamor të Zaporizhzhias,
• Kornizën e shkëmbimit të të burgosurve,
• Rikthimin e personave të dënuar ndërkombëtarisht.

Këto zhvillime tregojnë se negociatat po ecin paralelisht në dy shina: nga njëra anë përparim teknik në shumë fusha, dhe nga ana tjetër, bllokim politik në dy çështjet që do të përcaktojnë fatin e çdo marrëveshjeje paqeje – Donbasin dhe NATO-n.

Në këtë klimë të ndërlikuar, takimi i mundshëm Zelensky-Trump pritet të jetë vendimtar për të kuptuar nëse ka terren real për kompromis apo nëse bisedimet do të hyjnë në një tjetër fazë paqartësie.