Nga aktivizimi në Europian te puna në bujqësi, historia epike e shokut të Bajramit dhe Kumbullës: Familja ime jetonte në hambar, një mur na ndante nga kafshët

Një historike epike është duke bërë xhiron e rrjetit, ku protagonist është lojtari i kombëtares kroate, Martin Erliç, i cili gjithashtu është pjesë e Sasuolos në Serinë A, ku sezonin e shkuar ishte shok skuadre me Bajramin dhe Kumbullën.

Ai ka vendosur ta kalojë kohën e lirë në një mënyrë të pazakontë. Pas eliminimit të Kroacisë nga Europiani, 26-vjeçari bëri të ditur se po punonte në fushë. Një foto e Erliçit duke shijuar bujqësinë me familjen e tij është publikuar në Instagram. 

“Puna ime e preferuar është gërmimi i patateve, vijnë 15-20 veta dhe është gallatë. Karotat korren me dorë, kalojnë në parmendë dhe i marrim. Vëllai im dhe unë e çuam ujin me kamion kur perimet duhej të vaditeshin. Gjëja më e vështirë është të shkosh të punosh në dimër, kur është acar dhe të nxjerrësh karotat.  

Nuk është turp, por këtë nuk e kam thënë kurrë. Zakonisht më pëlqen t’i mbaj për vete gjëra të tilla. 

Duke ndihmuar familjen që në fëmijëri, fitova zakone të punës. Kur linda, familja ime jetonte në një hambar. Në një dhomë kishte kafshë dhe ne na ndante prej tyre vetëm një mur. Kanë qenë momente shumë të vështira.

Babai im më mësoi të ndaja 10 kunat e fundit me miqtë e mi. Gjithmonë më thoshte se është e rëndësishme që njerëzit të më vlerësojnë dhe të mos më kujtojnë si një njeri koprrac dhe egoist. Gjithmonë përshëndes çdo njeri, e bëj për respekt, nga pastruesi në klub e deri te drejtori – kujton Erliç.

Vlen të theksohet fakti se vlera e kartonit të Erliç sipas “Transfermarkt” shkon 3 milionë euro.