Nga sulmi terrorist, Kosova përfiton në tavolinë/ Politico:  Vuçiç s’duket partner konstruktiv

Sulmi terrorist në Banjskë të Zveçanit, në sytë e ndërkombëtarëve, e ka vendosur Kosovën në piedestal. Serbia, në anën tjetër, nuk duket më si palë konstruktive. Kështu i paraqet Politico zhvillimet e fundit në veri të Kosovës, në një analizë ku shtjellohet se kë favorizojnë ato.

Duke krahasuar komentet nga liderët kosovarë dhe atyre serbë, për sulmin terrorist të 24 shtatorit, del se Beogradi fshihet pas tensioneve. Me konfirmimin e liderit serb, kryeterroristi Milan Radojiçic kreu sulmin në Banjskë, ku mbeti i vrarë një pjesëtar i Policisë së Kosovës, teksa përfshirjen e tij e ka pranuar edhe vetë Radojiçic.

Bojan Pajtiç, profesor serb i drejtësisë dhe ish-president i krahinës autonome të Vojvodinës brenda Serbisë, pajtohet se provokimi në Banjskë s’mund të ketë ndodhur pa dijeninë e agjencisë së sigurisë, BIA-s serbe.

Ai ka thënë se nuk ka gjasa që BIA të mos ketë vënë re operacionin e përmasave kaq të mëdha, që ishte brenda një zonë aq të vogël.

“BIA zakonisht e di se kush dhe me kë ka pirë kafe dje në Zveçan”, ka thënë ai, për Politico.

“Kur ndodh një incident që nuk është i rastësishëm, por rezultat i përpjekjeve të dikujt, gjithmonë rrjedh pyetja se në interesat e kujt është ”, tha Pajtic. “Në këtë rast, sigurisht që nuk është në interesin e Aleksandër Vuçicit, sepse pas përpjekjes së fundit për dialog në Bruksel, në sytë e Perëndimit, në raport me Kurtin, ai ende dukej si një partner konstruktiv”.

Por Pajtic, shkruan Politico, nuk është i vetmi që hamendëson se në interes të kujt ishte sulmi terrorist, dhe deri më tani, si Uashingtoni ashtu edhe Brukseli kanë qenë jashtëzakonisht të kujdesshëm në komentet e tyre.

Zëdhënësi i Bashkimit Evropian, Peter Stano, tha se BE-ja do të presë përfundimin e hetimit përpara se të dalë në ndonjë përfundim. Uashingtoni, nga ana tjeter eshte treguar i kujdesshëm për të mos mbajtur anë, gjithashtu nuk ka qenë specifik se kë fajëson.

Kjo, natyrisht, është në kontrast të thellë me Moskën, e cila edhe pritej t’i mbante anën Serbisë, siç ndodh tradicionalisht, duke akuzuar Prishtinën për spastrim etnik në veri të Kosovës, e njejta gënjeshtër e përdorur për të justifikuar pushtimin e Ukrainës nga presidenti rus Vladimir Putin.

“Ky incident, qe eshte shembulli më i rëndë i dhunës në Kosovë për vite me radhë, i ktheu tavolinat Vuçicit,” tha Dimitar Bechev, një studiues I Ballkanit

Por gjithashtu ai ngre pikëpyetje nëse sulmi u urdhërua nga Vuçiqi apo ishte një operacion i pavarur nga ultra-nacionalistët serbë dhe lideret serbë të Kosovës. Nese eshte kjo e fundit, sipas tij, tregon se Vuçiq ka humbur kontrollin mbi “krahun e tij të djathtë”.