Ngrihen dyshime mbi veprimtarinë kriminale të Doshi në Australi

Këto ditë, platforma hulumtuese, Projekti për Raportimin e Krimit të Organizuar dhe Korrupsionit, publikoi një hulumtim të bazuar në dosjet e Komisionit Australian për Zbulimin e Veprimtarive Kriminale që identifikon biznesmenin dhe ish deputetin shqiptar, Tom Doshi si drejtues të një grup kriminal në Australi, të përfshirë në trafikim narkotikësh, pastrim parash dhe shkelje të rregullave të emigracionit. Është hera e parë që dyshimet për lidhjet e zotit Doshi me krim të organizuar në Australi, ku kishte jetuar në fund të viteve ‘90, bëhen publike. Doshi – një aleat politik i kryeministrit të Shqipërisë Edi Rama – përshkruhet si kreu i një sindikate krimi në Australi. Zoti Doshi i ka mohuar akuzat. Por, redaktori Brian Fitzpatrick nga Platforma Hulumtuese për Raportimin e Krimit të organizuar dhe Korrupsionit, në një bisedë me Zërin e Amerikës, thotë se dosjet e komisionit australian ofrojnë një pamje të zymtë të këtyre grupeve kriminale shqiptare dhe rrezikut që ato paraqesin për sigurinë kombëtare të Australisë.

Redaktori Brian Fitzpatrick thotë se në Australi gjatë viteve 2000 u krijuan një sërë rrjetesh të krimit të organizuar shqiptar, që merreshin me trafikim qeniesh njerëzore, pastrim parash dhe kontrabandë drogash. Rrjetet ishin të organizuara mbi baza klanore. Një prej tyre, sipas redaktorit Fitzpatrick, ishte rrjeti i supozuar i politikanit dhe biznesmenit Tom Doshi. Sipas dosjeve të autoriteteve australiane, këto grupe, aktive të paktën deri vitin 2020, janë të shtrira përgjatë disa qyteteve australiane, përfshirë Melbournin, Adelaiden dhe Perthin.

“Kemi shqyrtuar një sërë dokumentesh nga Komisioni australian për Zbulimin e Veprimtarive Kriminale, Në to skicohet se si krimi i organizuar shqiptar, që vepronte në bazë të një klanor, ka krijuar një perandori kriminale në Australi që nga viti 2000. Raportet përshkruajnë se si grupet e krimit të organizuar shqiptar shfytëzojnë mangësitë e sistemit të emigracionit dhe përmes trafikimit të drogës, kontrabandimit të njerëzve dhe duke shfrytëzuar pasaportat e përfituara me mashtrime dhe dokumente të falsifikuara emigracioni sigurojnë hyrjen në Australi. Në momentin që hyjnë aty, vazhdojnë të manipulojnë sistemin, duke shfrytëzuar procesin e stërzgjatur të vizave për të qëndruar në Australi dhe gjatë kësaj kohe përfshihen në vepërimtari kriminale” thotë zoti Fitzpatrick.

Sipas tij, mes tyre është edhe rrjeti që agjencia australiane pretendon se udhëhiqej nga zoti Doshi dhe përbëhet nga anëtarë të familjes së tij të gjerë. Tetë nga anëtarët e këtij rrjeti janë kushërinj të zotit Doshi dhe janë subjekt hetimesh nga autoritetet australiane për trafikim droge dhe pastrim parash gjatë viteve të fundit. Aktivitetet e tyre përfshijnë kultivimin e kanabisit dhe përdorimin e fitimeve nga shitja e tij për importimin e kokainës në Australi. Ato që përshkruan raporti australian i zbulimit, sipas zotit Fitzpatrick, tregojnë për një skemë afatgjate të organizimit të këtyre grupeve.

“Dosjet përmbajnë hollësi për pesë cikle të jetës së krimit të organizuar shqiptar në Australi. Ato përfshijnë rekrutimin e këtyre njerëzve në Shqipëri, dërgimin e tyre në Australi, duke u premtuar punë dhe duke përdorë dokumente të dyshimta për të qëndruar në Australi, ku më pas përfshihen në aktivitete kriminale, deri sa kapen dhe dëbohen nga vendi. Janë mjaft të detajuara dhe tregojnë se këto grupe nuk lindin organikisht, ato kanë një plan afatgjatë në mendje, kur i dërgojnë njerëzit drejt Australisë. E dinë se çfarë po bëjnë,” theksoi zoti Fitzpatrick.

Zoti Doshi, i cili që nga viti 1997 ka kaluar një pjesë të jetës së tij në Australi, i ka mohuar pretendimet e autoriteteve australiane. Ai ka mohuar se drejton një organizatë krimi në Australi dhe ka hedhur poshtë pretendimet se një rrjet i tillë është i përbërë nga familjarët e tij.

Por, zoti Fitzpatrick thotë, se ndonëse nuk është ngritur aktakuzë ndaj zotit Doshi, raporti australian ngre shqetësim për aktivitetin e klaneve kriminale me origjinë nga Shqipëria.

“Këto janë raporte të agjencive të zbulimit dhe të policisë. Nuk ka akuzë të ngitur në këtë rast ndaj zotit Doshi në Australi, SHBA apo Britaninë e Madhe me sa dimë, dhe ai mbetet i pafajshëm derisa të dëshmohet ndryshe. Por, këto dosje gjithsesi krijojnë një pamje të qartë rreth klaneve, jo vetëm të tij, por edhe klaneve tjera, dhe rrezikun që ato paraqesin për sigurinë kombëtare të Australisë,” thotë zoti Fitzpatrick.

Raporti australian përqendrohet në rastin e dy nipave të zotit Doshit, të cilët sipas autoriteteve, kanë përdorur përfitimet nga kultivimi i kanabisit për të importuar kokainë dhe meta-amfetaminë në Australi. Njërit prej tyre është arrestuar dhe ndaj tij është ngritur aktakuza për trafikim narkotikësh dhe pastrim parash, pasi policia gjeti një sasi kokaine me vlerë prej 1 milion dollarësh të fshehur në një aparat për prodhim tymi.

Raporti i Projektit për Krim të Organizuar dhe Korrupsion, po ashtu konfirmon edhe zërat, që u përhapën në Shqipëri për rastin e ish agjentit të FBI-së, Charles McGonigal, se ishte biznesmeni shqiptar Tom Doshi ai që i kishte kërkuar ndihmë agjentit të FBI-së, për atë që zoti Doshi pretendonte, se ishte një komplot për ta vrarë.

Sipas zotit Fitzpatrick, agjenti McGonigal e kishte takuar zotin Doshi më shumë se një herë.

“Ish agjenti McGonigal akuzohet për takime me një numër biznismenësh dhe politikanësh, por në aktpadi nuk jepen emrat e tyre. Ai është akuzuar se ka marrë shuma të caktuara parash nga një shqiptar në SHBA. Në njerën nga aktakuzat, thuhet se ai u takua me një biznismen dhe politikan, që kërkonte ndihmë për të zbuluar një komplot për vrasjen e tij. Dhe raportimi ynë zbulon se ky person, në fakt, është Tom Doshi. Një nga burimet na tha se takimi ishte shumë miqësor. Takimi ndodhi para se zoti Doshi të shpallej persona non-grata nga SHBA-të. Më pas edhe vet zoti Doshi na e konfirmoi takimin, por, ai ofroi një interpretim tjetër, duke thënë se ishte zoti McGonigal që e kishte kërkuar takimin, kur në fakt burimet tona tregonin se fjala ishte për diçka tjetër,” thotë zoti Fitzpatrick.

Në Shqipëri, zoti Doshi ka qënë anëtar parlamenti për tri mandate si anëtar i Partisë Socialiste dhe kryeson Partinë Social-Demokrate. Në vitin 2018, Shtetet e Bashkuara të Amerikës ia ndaluan udhëtimin në Amerikë atij dhe familjes, për shkak “të përfshirjes në korrupsion të përmasave të gjëra.

Marrë nga VOA