Një viktime dhe 21 të plagosur, si ndodhi përplasja mes dy gangsterëve

Mbrëmë pak para mesnatës ka ndodhur një shkëmbim gjuajtjesh me armë zjarri në lokalin “Bon Vivant”, nga dy grupe të njohura të krimit.

Në njërën anë Andi Pajaziti me grup, i cili është i njohur për rreth 150 vepra penale dhe u lirua para pak kohësh nga burgu, dhe në anën tjetër Dukagjin Nikollaj, i shumëkërkuari i Policisë dhe FBI-së amerikane.

Sipas dëshmitarëve dhe Policisë, të dyja grupet kanë shtënë me armë zjarri ndaj njëri-tjetrit me ç’rast mori plagë vdekjeprurëse një person dhe u plagosën 7 të tjerë nga arma e 10 nga prerje të xhamit nga kaosi.

Sipas dëshmitarëve, ngjarja nisi kur të dyja grupet u fjalosën dhe nisën një rrahje, pas të cilës nxorën armët dhe i shkrepën disa herë.

Detaje të rastit ka dhënë edhe Policia e Kosovës, e cila ka ndërhyrë menjëherë. Edhe Policia ka konfirmuar se pesë persona dyshohet të kenë gisht në ngjarjen tragjike që ndodhi mbrëmë në mes të kryeqytetit.

Por, kush është Dukagjin Nikollaj dhe Andi Pajaziti?

Përpos përfshirjes në përleshjen e mbrëmshme në Prishtinë, “Duka” ka të kaluar kriminale edhe në Shtetet e Bashkuara të Amerikës. Ai është njëri prej shqiptarëve më të kërkuar nga FBI.

Dukagjin Nikollaj, sipas Byrosë Federale të Hetimeve (FBI), dyshohet të jetë i përfshirë në blerjen e sasive të mëdha të marijuanës nga Kanada dhe shpërndarjen e tyre në zonën e New Yorkut.

“Duka” thuhet të jetë pjesëtarë i organizatës kriminale “Krasniqi Organization”, të dyshuar për trafikim droge dhe vrasje.

Urdhër arresti për “Dukën” është lëshuar në maj të vitit 2010 nën akuzat për shpërndarje të lëndëve narkotike. Ai ka kontrolluar rrethin e drogës nga viti 2003 deri në vitin 2007.  Foto: Dukagjin Nikollaj

Ndërkaq, Andi Pajaziti i njohur me nofkën “Italiani” që ka mbetur mbrëmë i plagosur në sherrin me armë që ndodhi në kafen “Bon Vivant”, njihet për mbi 100 vepra penale.

Ai mbahet mend edhe për rastin që kishte ndodh më 2019, në klubin e natës, “Duplex”.

Atë kohë nga shtënat me armë zjarri pranë hyrjes së “Duplex”-it, kishin mbetur të plagosur katër persona.

Plumbat dyshohet se kishin ardhur nga Astrit Mehmeti i njohur me nofkën “Llepota” dhe dy shoqëruesit e tij që ishin Kushtrim Krasniqi dhe Andi Pajaziti.

Ky i fundit atë kohë nuk kishte arritur të kapej në vend nga Policia, dhe nga arratia pati folur për motivet që sipas tij çuan deri te plagosja e katër personave.