OCTOPUS gozhdon Serbinë, rreziku për konflikt dhe përgjigja e Perëndimit

Serbia po fabrikon narrativa se serbët janë të kërcënuar në Kosovë. Rreziku për një konflikt përmendet në një studim të Institutit për Studimin e Luftës Hibride, OCTOPUS.

Planet e i presidentit serb, Aleksander Vuçiç për dominim, thuhet se kërcënojnë ta destabilizojë rajonin, teksa rekomandohet që Kosova të mbështetet në rritjen e kapaciteteve të saj për ta penguar luftën hibride. Sipas institutit, përgjigja e komunitetit ndërkombëtar, veçanërisht ajo e Perëndimit, do të jetë vendimtare në formësimin e trajektores së ardhshme të rajon.

Studimi i titulluar “Politika e frikës: Fabrikimi i rrezikimit të pakicës serbe në Kosovë si një strategji ekspansioniste e Serbisë”, vë në pah “ambiciet ekspansioniste të Serbisë nën maskën e mbrojtjes së serbëve jashtë vendit”.

“Ringjallja e këtij nacionalizmi ekspansionist I ka rrenjët në formulimin e ‘Nacertanije’ nga Ilija Garašanin në shekullin e 19-të. Ky dokument hodhi themelet e ideologjisë së Serbisë së Madhe, duke synuar bashkimin e të gjitha territoreve serbe, një temë që është rishfaqur vazhdimisht në veprimin politik serb.

“Kjo rrymë e fshehur nacionaliste nuk është një relike e së kaluarës, por një ideologji e gjallë që ndikon ndjeshëm në politikën e sotme serbe, duke formësuar ndërveprimet e saj me vendet fqinje dhe trajtimin ndaj popullatave pakicë. Udhëheqja autokratike e Aleksander Vuçiç ka forcuar më tej ambiciet nacionaliste të Serbisë. Vuçiç, duke përdorur modelin e tij autoritar të qeverisjes, e ka pozicionuar veten si një figurë kyçe në ndjekjen e ëndrrës së një ‘bote serbe’ – thuhet në studim.

“Vizioni i tij për Serbinë shtrihet përtej pretendimeve të thjeshta territoriale, duke aspiruar drejt një hegjemonie kulturore dhe politike në Ballkanin Perëndimor që rezonon me narrativat nacionaliste të së kaluarës. Për Serbinë, mbështetja ruse forcon pozicionin e saj kundër presionit dhe sanksioneve perëndimore, duke i mundësuar asaj të ndjekë objektivat e saj në mënyrë më agresive. Kjo marrëdhënie simbiotike nënvizon lojën gjeopolitike të shahut në rajon, ku aspiratat e Serbisë janë të ndërthurura me ambiciet globale të Moskës për te sfiduar hegjemoninë perëndimore dhe për ta zgjeruar ndikimin e saj” –  thuhet në studim e institutit prestigjoz.