Osmani propozon marrëveshje strategjike me Britaninë e Madhe për mbrotjen, Sekretari i Shtetit Lammy jep dakordësinë

Presidentja e Kosovës, Vjosa Osmani ka thënë gjatë takimit me Sekretarin e Jashtëm të Mbretërisë së Bashkuar David Lammy, se ka propozuar një marrëveshje për thellimin e bashkëpunimit në fushat e mbrojtjes dhe ekonomisë. Osmani po ashtu theksoi se kjo vizitë është një dëshmi e marrëdhënieve të shkëlqyera mes Kosovës dhe Mbretërisë së Bashkuar, një aleancë e ndërtuar mbi vlerat e përbashkëta të demokracisë, të lirisë dhe të paqes.

“Sot kam bërë propozimin për lidhjen e marrëveshjes për thellimin strategjikë të bashkëpunimit ndërmjet Kosovës dhe Mbretërisë së Bashkuar që në veçanti do të mbulojë fushën e mbrojtjes dhe të ekonomisë. Jemi të përkushtuar të vazhdojmë bashkëpunimin në mes të ekipeve dhe institucioneve tona për ta konkretizuar këtë partneritet dhe për t’i dhënë formën e duhur.

Konsideroj se ka hapësirë të jashtëzakonshme për fuqizim të mëtutjeshëm të aleancës sonë dhe prezencë akoma më aktive të Mbretërisë së Bashkuar në Kosovë dhe anasjelltas. Përkushtimi i Mbretërisë së Bashkuar ka qenë i jashtëzakonshëm por edhe i pandërprerë gjatë të gjitha fazave të shtet-ndërtimit tonë. Nga mbështetja jonë për çlirimin, pastaj me shpalljen e pavarësisë e deri të forcimi i institucioneve tona demokratike.

Roli juaj ka qenë kyç dhe për këtë jemi thellësisht mirënjohës. Gjatë ditës kemi pas nderin të ju takojmë në shumë raste dhe ngjarje të ndryshme prandaj vazhdimi i diskutimeve tona sot në një format më të avancuar dëshmon rëndësinë që të dyja vendet tona i kushtojnë forcimit të marrëdhënieve bilaterale”, tha Osmani.

Osmani pas konferencës me sekretarin e Jashtëm britanik, David Lammy ju uroj suksese partive politike si dhe Kuvendit duke theksuar se ka kohë të mjaftueshme deri në mbajtjen e seancës konstituive dhe duke shpresuar që ky proces të realizohet sa më mirë.