Osmani: Synoj mandatin e dytë si presidente

Presidentja e Kosovës, Vjosa Osmani, ka konfirmuar se synon edhe një mandat tjetër si presidente e shtetit, duke bërë të ditur se pas formimit të institucioneve të reja do të nisë bisedime me partitë politike për mbështetjen e kandidaturës së saj.

Osmani në një intervistë me Radio Evropa e Lirë tha se vendimi për zgjedhjen e presidentit i takon Kuvendit të ri, por theksoi se, pavarësisht rezultatit, ajo do të vazhdojë angazhimin e saj politik.

“Synoj të vazhdoj angazhimin politik edhe nëse nuk zgjidhem presidente”, u shpreh ajo.

“Do të bisedoj me të gjitha partitë shqiptare. Do të duhet që të ulemi të diskutojmë dhe të shihet nëse do të dëshirojnë që të dëgjohet vullneti i qytetarit i cili është i qartë. Në shumicën dërrmuese të matjeve shihet që diku 81% të qytetarëve dëshirojnë një mandat të dytë për mua. Do të shohim nëse deputetët dëshirojnë një materializim të këtij vullneti. Nëse deputetët nuk dëshirojnë dhe nuk kanë vullnet, unë do ta vazhdoj angazhimin tim politik”, ka deklaruar Osmani.