Përmes UFO-ve, Amerika po fsheh projektet sekrete të zhvilluara nga Pentagoni në shkretëtirë nga…

Një zyrë e vogël e Pentagon-it kishte kaluar muaj duke hetuar teoritë konspirative rreth programeve sekrete të UFO-ve në Washington kur zbuloi një të vërtetë tronditëse: të paktën një nga këto teori ishte ushqyer nga vetë Pentagoni. Hetimi i urdhëruar nga Kongresi Amerikan i çoi hetuesit në vitet ’80, kur një kolonel i Forcave Ajrore vizitoi një bar pranë Zonës 51, një vend tepër sekret në shkretëtirën e Nevada-s. Ai i dha pronarit foto të asaj që mund të ishin disqe fluturuese. Fotot u ngjitën në mure dhe në gojëdhënat lokale u shtua ideja se ushtria amerikane po testonte fshehurazi teknologjinë e rikuperuar të alienëve.

Por koloneli ishte në një mision – të dezinformimit. Fotot ishin të manipuluara, tregoi oficeri tanimë i pensionuar para hetuesve të Pentagon-it në vitin 2023. I gjithë ushtrimi ishte një dredhi për të mbrojtur atë që po ndodhte vërtet në Zonën 51: Forcat Ajrore po e përdornin vendin për të zhvilluar avionë luftarakë të fshehtë, të parë si një avantazh kritik kundër Bashkimit Sovjetik. Udhëheqësit ushtarakë ishin të shqetësuar se programet mund të ekspozoheshin nëse vendasit do të shihnin një fluturim prove të luftarakëve të fshehtë F-117, një avion që me të vërtetë dukej si jashtëtokësor. Më mirë të besonin se vinte nga Andromeda.

Ky episod, i raportuar tani për herë të parë, ishte vetëm një nga një seri zbulimesh që bëri ekipi i Pentagon-it ndërsa hetonte dekada pretendimesh se Washington-i po fshihte atë që dinte për jetën jashtëtokësore. Kjo përpjekje kulmoi në një raport, të publikuar vitin e kaluar nga Departamenti i Mbrojtjes, që i gjeti akuzat për një mbulim qeveritar si të pabaza. Në fakt, një hetim i Wall Street Journal zbulon se vetë raporti përbënte një mbulim – por jo në mënyrën që industria e konspiracionit të UFO-ve do t’i bënte njerëzit të besonin.

Zbulimi publik la jashtë të vërtetën pas disa prej miteve themelore rreth UFO-ve: Vetë Pentagon-i ndonjëherë i synonte qytetarët e vet përmes dezinformimit. Në të njëjtën kohë, vetë natyra e operacioneve të Pentagon-it – një burokraci e errët që mbante programe sekrete të ngulitura brenda programeve sekrete, të mbuluara me histori mbulimi – krijoi terren pjellor për përhapjen e miteve. Këto gjetje përfaqësojnë një kthesë të re mahnitëse në historinë e obsesionit kulturor të Amerikës me UFO-t.

Në dekadat pas një transmetimi radiofonik të vitit 1938 të “Luftës së Botëve” të H.G. Wells që përhapi panik në të gjithë vendin, spekulimet rreth vizitorëve alienë mbetën kryesisht në fushën e tabloidëve të supermarketeve, filmave të Hollivudit dhe konferencave të kostumeve në Las Vegas. Kohët e fundit, gjërat morën një kthesë të gabuar kur një grusht ish-zyrtarësh të Pentagon-it dolën publikisht me akuza për një program qeveritar për të shfrytëzuar teknologjinë jashtëtokësore dhe për ta fshehur atë nga amerikanët. Këto pretendime çuan në hetimin e Pentagon-it.

Tani, po dalin prova që tregojnë se përpjekjet e qeverisë për të përhapur mitologjinë e UFO-ve datojnë që nga vitet 1950. Ndonjëherë, si me mashtrimin rreth Zonës 51, oficerët ushtarakë përhapën dokumente të rreme për të krijuar një perde për programe të vërteta të armëve sekrete. Në raste të tjera, zyrtarët lejuan që mitet e UFO-ve të zinin rrënjë në interes të sigurisë kombëtare – për shembull, për të parandaluar Bashkimin Sovjetik të zbulonte dobësitë në sistemet që mbronin instalimet bërthamore.

Hetuesit ende po përpiqen të përcaktojnë nëse përhapja e dezinformimit ishte akt i komandantëve dhe oficerëve lokalë apo një program më i centralizuar dhe institucional. Pentagoni nuk i ka përfshirë faktet kyçe në versionin publik të raportit të vitit 2024, të cilat mund të kishin ndihmuar në shuarjen e disa thashethemeve për UFO-t, si për të mbrojtur sekretet e klasifikuara ashtu edhe për të shmangur sikletet, zbuloi hetimi i WSJ-së.

Forcat Ajrore në veçanti kanë nxitur heqjen e disa detajeve që besonin se mund të rrezikonin programet sekrete dhe të dëmtonin karrierat. Mungesa e transparencës së plotë vetëm sa i ka dhënë më shumë energji teorive të konspiracionit. Anëtarët e Kongresit kanë formuar një grup, të përbërë kryesisht nga republikanë, për të shqyrtuar fenomenet anomale të paidentifikuara, ose UAP, në gjuhën burokratike.

Grupi ka kërkuar që komuniteti i inteligjencës të zbulojë se cilat agjenci “janë të përfshira në programet e rikuperimit të rrëzimeve të UAP-ve”. Skepticizmi i MAGA-s në lidhje me “deep state” ushqen më tej idenë se burokratët qeveritarë i kanë mbajtur këto sekrete nga publiku amerikan. Në një seancë dëgjimore në nëntor të dy nënkomiteteve të Mbikëqyrjes së Dhomës së Përfaqësuesve, përfaqësuesja Nancy Mace, një republikane nga Karolina e Jugut, hodhi dyshime mbi raportin e Pentagon-it.

“Unë nuk jam matematicene, por mund t’ju them se kjo nuk qëndron”, tha ajo.