PERPLASJE FATALE/ Perëndimi duhet ta detyrojë Serbinë të mendojë dy herë para se të veprojë

Kryeministri i Kosovës, Albin Kurti, ka theksuar se partnerët e aleatët ndërkombëtarë duhet të ndërmarrin masa për të siguruar që Serbia pro-ruse të mendojë dy apo tre herë para se të ndërmarrë veprime destabilizuese në Ballkanin Perëndimor.

Në një intervistë për gazetën kroate “Vecernji List”, kreu i ekzekutivit kosovar ka shtuar se është thelbësore që NATO-ja dhe Bashkimi Evropian të forcojnë pozitat e tyre për të parandaluar çdo përpjekje të Serbisë dhe Rusisë për të nxitur tensione.

“Ne nuk jemi në gjendje të luajmë një rol të madh, por duhet të përgatisim vendin tonë dhe partnerët e aleatët tanë në mënyrë që të jemi sa më të fortë dhe kështu ta bëjmë Beogradin të mendojë dy herë apo edhe tre herë para se të bëjë diçka”, ka thënë Kurti, I cili gjithashtu ka vlerësuar se nëse presidenti rus, Vladimir Putin, urdhëron presidentin serb, Aleksandër Vuçiç, të ndërmarrë veprime destabilizuese në rajon, ai do të veprojë pa asnjë mëdyshje, kryesisht për shkak të partneritetit të tyre të ngrohtë.

“Përshtypja ime është se Vuçiçi e do dhe i frikësohet Moskës më shumë sesa Brukselit dhe Uashingtonit. Prandaj, edhe frika edhe dashuria e tij orientohen në verilindje, jo në veriperëndim. Prandaj NATO-ja dhe BE-ja duhet të llogarisin në faktin se nëse një ditë Putini urdhëron Vuçiçin, ai nuk do të mund të thotë jo”, ka shtuar Kurti

Kujtojme se aleanca mes Serbisë dhe Rusisë është themeluar mbi një ndjenjë pakënaqësie ndaj aleancës së NATO-s të udhëhequr nga Shtetet e Bashkuara për mbështetjen dhe krijimin e shtetit të pavarur të Kosovës. Rusia përsërit rregullisht gatishmërinë për t’i ofruar Serbisë “garanci” se Kosova s’do të fitojë njohje të plotë ndërkombëtare.