‘Platforma për Krimenë’, Ukraina kërkon rikthimin

60 liderë botërorë rreshtohen krah Presidentit Zelensky në të ashtuquajturën ‘Platforma për Krimenë’, ku është kërkuar kthimi i Krimesë, Ukrainës, një mënyrë kjo për të rritur presionin ndërkombëtar ndaj Rusisë për gadishullin me pamje nga Deti i Zi.

Ky është takimi i dytë pas samitit në gusht të vitit 2021, një ngjarje videokonferencë në të cilën presidenti polak Andrzej Duda mori pjesë personalisht, së bashku me presidentin ukrainas Volodymyr Zelenskyy.

Rusia aneksoi në mënyrë të njëanshme Krimenë në vitin 2014 me një pushtim ushtarak, pas krizës institucionale dhe protestave të ‘Euromaidan’ kundër presidentit ukrainas pro-rus Viktor Janukoviç, të cilat kulmuan me dorëheqjen e tij.

Ndërkohë Gadishulli vazhdon të njihet ndërkombëtarisht si pjesë e Ukrainës. Sipas Kievit, mbështetja e komunitetit ndërkombëtar është thelbësore për ta rikthyer Krimenë nën kontrollin ukrainas dhe në shtratin pro-evropian të lumit, por për Putinin, aneksimi i Krimesë nuk është i negociueshëm.

Banorët e Krimesë janë pajisur me pasaporta dhe dokumente ruse dhe Kremlini ka shpenzuar mbi 2.5 miliardë euro për të ndërtuar një rrugëkalim që lidh – fizikisht dhe simbolikisht – Krimenë me kontinentin rus.

Nga ana e tyre, banorët kanë denoncuar diskriminimin e ashpër ndaj komunitetit tatar të Krimesë, si dhe dëbimet e detyruara dhe shkeljet e të drejtave të njeriut. Tatarët përfaqësojnë pothuajse 15% të 2.3 milionë banorëve të Krimesë dhe kanë kundërshtuar aneksimin e Moskës. 30,000 qytetarë të kësaj etnie besohet se janë larguar nga Krimea që nga viti 2014.