Preç Zogaj: Këta thonë ose na votoni ne, ose vrisni veten. Nuk ka rrotacion në Shqipëri, pa rrotacion në PD

Preç Zogaj thotë se rrotacioni politik në Shqipëri nuk mund të ndodhë me një opozitë që sulmon SPAK-un dhe ndërkombëtarët.

I ftuar në emisionin “Të Paekspozuarit” në MCN TV, Zogaj tha se nuk mund të ketë rrotacion në Shqipëri pa u ndryshuar lidershipi në PD.

“Kjo protestë ishte thirrur për të verifikuar se sa është rritur kjo parti pas marrjes së logos, që mbetet ta bëjnë ata që janë atje. Gazetarët thanë se është i njëjti siç ka qenë. Këtu pamë se kishte në fokus sulmin kundër SPAK dhe drejtësisë, dekurajimin e SPAK dhe drejtësisë.

Rrotacioni në Shqipëri, nuk e pengojnë ndërkombëtarët. Rrotacionin e pengon kjo elitë politike që nuk di të ikë. E kanë vënë popullin pas murit, thonë ose na votoni ne, ose vrisni veten.

Nuk mund të ndodhë rrotacion në Shqipëri nëse kjo opozitë mbetet ajo që ka qenë për shumë e shumë vite.

Nga përvoja ime dhe njohja që kam për jetën politike, shoh që ekziston një popull opozitar që është mazhorancë, numerikisht, por fitorja nuk mund të vijë nëse do ta kushtëzosh, o unë ose askush. Ose do të sfidoni partnerët, ose nuk ka fitore.

Nëse nuk gjejnë zgjidhje për të çliruar lidershipin e PD nga kapja, për t’i hapur rrugë një rrotacioni brenda opozitës, nëse nuk ofrohen si fuqi politike e përlqyeshme për njerëzit, shumë vështirë është që të ketë sukses”, tha Zogaj.