Presioni ndaj Kurtit po dobësohet/ Frikë se nuk do ketë asociacion

Kryetari i Komisionit të Kuvendit të Serbisë për Kosovën, Millovan Drecun vlerësoi se vëmendja e BE-së dhe e SHBA-së aktualisht është e përqendruar në organizimin e një takimi të nivelit të lartë në Bruksel, gjë që sipas tij është e gabuar sepse duhet të përqendrohet për deeskalimin e situatës në veri të Kosovës.

Duke komentuar vizitën e të dërguarit special të BE-së për dialogun ndërmjet Beogradit dhe Prishtinës, Miroslav Lajçak, Drecun tha se nuk e sheh se cili mund të jetë rezultati i takimit të nivelit të lartë dhe shtoi se vëmendja duhet të përqendrohet në eliminimin e arsyeve që çuan në këtë lloj situate.

“Presioni ndaj Albin Kurtit po dobësohet, edhe pse ai po luan me de-përshkallëzimin, duke krijuar iluzione. Nuk ka indikacione se policia nga veriu do të tërhiqet, vetëm se intensiteti i terrorit ndaj serbëve me sa duket është ulur – arrestimet ende po bëhen. Ende nuk janë bërë dhe as hapat e parë për formimin e asociacionit dhe derisa kjo të zgjidhet, mendoj se është e kotë të organizohen takime apo samite” –  tha Drecun.

Ai shtoi se duket që synimi është të tregohet se diçka po bëhet dhe t’i “luten Zotit” që në atë takim të bien dakord për diçka, edhe pse nuk ka zgjidhje reale.

Drecun theksoi se nuk mund të gjejë ndonjë arsye racionale për të besuar se Kurti është i gatshëm të arrijë marrëveshje politike dhe të rikthejë situatën para kësaj krize në veri, pra para se serbët të largoheshin nga institucionet.