Pritet stuhi lufte/ Tensionet mes Kosovës dhe Serbisë

Një organizatë private e intelegjencës me seli në Londër të Britanisë së Madhe paralajmëroi se do ketë përshkallëzim të tensioneve Kosovë-Serbi në gjashtë muajt e ardhshëm, duke përfshirë edhe shtetet fqinje të rajonit, posaçërisht nëqoftëse Qeveria e Kosovës nuk lëvizë nga qëndrimi për ndalimin e dinarit serb që përdoret kryesisht në komunat veriore të vendit.

“Tensionet etnike në Kosovë gjatë 6 muajve të ardhshëm ka mundësi të ritten, teksa qeveria zbaton vendimin për ndalimin e dinarit. Përplasja ndërmjet Serbisë dhe Kosovës ka të ngjarë të përkeqësojë edhe tensionet rajonale në 6 muajt e ardhshëm, ndërsa vendet fqinje do rreshtohen me njërën apo tjetrën palë” – paralajmëroi organizata britanike.

Gjithashtu, në analizën e organizatës “Dinamika Gri” mbi rrjedhën e tensionuar të marrëdhënieve midis Kosovës dhe Serbisë, konsiderohet se ka të ngjarë që Bashkimi Evropian dhe Shtetet e Bashkuara  të ndërhyjnë gjatë 6 muajve të ardhshëm në përpjekje për të stabilizuar rajonin për shkak të tensioneve të shtuara ndërmjet Prishtinës dhe Beogradit.

“Në këtë drejtim, asnjëra palë nuk i ka ulur tensionet, duke shkaktuar shqetësim në Evropë. Me sa duket, duke pasur parasysh vëmendjen evropiane dhe amerikane ndaj konfliktit të vazhdueshëm ndërmjet Ukrainës dhe Rusisë, situata e sigurisë në rajon rrezikohen të përshkallëzohet” – thuhet në raport.

Kjo atmosferë e nxehtë në marrëdhëniet midis dy vendeve tashmë është bërë normë dhe pritet të vazhdojë edhe përgjatë vitit 2024. Një vendim i fundit i Bankës Qendrore të Kosovës (BQK), nëpërmjet së cilës synohet të ndalohet qarkullimi i dinarit serb nё territorin kosovar, shtroi shtresa të reja në rrjedhën e tensionuar të marrëdhënieve midis Kosovës dhe Serbisë.

Gjithashtu, në një artikull të gazetës gjermane “Welt” kushtuar tensioneve në Ballkanin Perëndimor, thuhet se frika nga ripërtëritja e konflikteve në këtë rajon të rrethuar nga armiqësitë entike është duke u rritur në kancelaritë perëndimore, posaçërisht pas sulmit të paramilitarëve serbë në veri të Kosovës dhe kërcënimeve secesioniste në Bosnje-Hercegovinë.

Në vorbullën e këtyre zhvillimeve, për shumë vëzhgues të huaj, perspektiva e rrëshqitjes drejt skajeve të krizës nuk mund të izolohet; derisa u krijohet mundësia lojtarëve lokalë serbë të lidhur me interesat ruse të zgjerojnë hijen kërcënuese dhe të provokojnë konflikte, tani rreziku i ripërshkallëzimit rri i varur mbi mbarë Ballkanin Perëndimor të ngjeshur nga tensionet.