Prokuroria e Stambollit lëshon urdhër arresti për Netanyahu-n

Zyra e Prokurorit Publik të Stambollit ka lëshuar urdhër-arreste për 37 të dyshuar, përfshirë kryeministrin izraelit Benjamin Netanyahu, me akuzat për kryerje gjenocidi, njoftoi zyra të premten.

Urdhër-arrestet u lëshuan si pjesë e një hetimi mbi krimet e dyshuara të luftës dhe mizoritë e kryera gjatë sulmeve të Izraelit në Gaza.

Të dyshuarit thuhet se përfshijnë figura të larta politike dhe ushtarake izraelite të akuzuara për drejtimin ose lehtësimin e sulmeve që rezultuan në vrasjen e mbi 68 mijë palestinezëve, kryesisht gra dhe fëmijë.

Pas paraqitjes së një kallëzimi penal në Zyrën e Prokurorit Publik, Kryetari i Shoqatës së Avokatëve të Stambollit, Yasin Şamlı, mbajti një konferencë për shtyp jashtë Gjykatës së Stambollit, duke dënuar Izraelin për kryerjen e “gjenocidit, krimeve kundër njerëzimit dhe krimeve të luftës” në Gaza, pavarësisht nënshkrimit të një marrëveshjeje armëpushimi.

Şamlı tha se veprimet e Izraelit nuk ishin të kufizuara në Gaza, duke theksuar se “struktura terroriste e Izraelit” ishte bërë një kërcënim për të gjithë njerëzimin.

Ai vuri në dukje se vetëm në dy vitet e fundit, Izraeli kishte kryer sulme në Liban, Siri, Tunizi, Iran, Katar, Jemen, Irak, Maltë dhe Egjipt.