Propozimi “merre ose lëre” i rrezikshëm/ Kearns: 5-shja e madhe të ketë qasje të balancuar

Kryetarja e Komisionit për Punë të Jashtme në Parlamentin e Britanisë së Madhe, Alicia Kearns, duke folur për vizitën e “pesëshes së madhe” të shtunën në Kosovë dhe Serbi, ka thënë se shpreson që top-diplomatët amerikano-evropianë të kenë një qasje të balancuar. “Shpresoj se ajo që do të shohim është ekuilibri dhe proporcionaliteti dhe të 5 te medhenjtë pranojnë se politika ‘Beogradi i Pari’ nuk është ajo që është e drejtë dhe në interesin më të mirë të të gjithë Ballkanit Perëndimor” –  ka thënë Kerans. Ne, ka theksuar ajo, “duhet të sigurohemi që mund t’i bashkojmë vendet dhe të punojmë drejt paqes dhe kjo do të thotë të dëgjojmë të gjithë zërat dhe të sigurohemi që të kalojmë në strukturat dhe proceset demokratike që sjellin paqen”. Ndërkohë ka pasur raportime se emisarët e vendeve perëndimore do të japin propozime të formës “mere ose lëre”, mirëpo për deputeten britanike kjo qasje është e rrezikshme. “Mendoj se ‘merre ose lëre’ është një politikë e rrezikshme për t’u ndjekur dhe se është shumë e rëndësishme që të kemi negociata dhe diskutime domethënëse me partnerët tanë, në mënyrë që të arrijmë në zgjidhjen më të mirë të mundshme”, deklaroi Kryetarja e Komisionit për Punë të Jashtme në Parlamentin e Britanisë së Madhe. NTV.AL të enjten ka raportuar ekskluzivisht për përmbajtjen e vizitës së pesë diplomatëve perëndimorë. Vetëmenaxhimi në këmbim të njohjes de facto do të jetë formula e vetme qe pesëshja do vendosë të shtunën në tavolinë si pjesë e marrëveshjes midis Kosovës dhe Serbisë. Marrëveshja synon të lejojë komunitetin serb në Kosovë të ketë një shkallë më të lartë të autonomisë dhe vetëqeverisjes, ndërsa në këmbim Kosova marr njohjen de facto nga Serbia. Kjo është një pjesë e shpërndarjes së përgjegjësive dhe të arriturave të ndërsjella midis dy vendeve dhe është një përpjekje për të normalizuar marrëdhëniet midis tyre në kuadër të dialogut dhe negociatave ndërkombëtare. Gjithashtu ky është një aspekt i rëndësishëm i procesit të normalizimit dhe është një nga pikat kyçe të marrëveshjeve bazike që janë diskutuar në negociata. Dihet edhe cilat janë opsionet e Kurtit para diplomacisë së prezentuar nga Lajçak, Escobar, Bonne, Plotner dhe Talo. Kurti ka katër opsione: Të tërhiqet nga Marrëveshja e Parë, të ndryshojë Kushtetutën, të mos bëjë asgjë, ose të propozojë një zgjidhje kreative të shtunën. Siç ka shkruar edhe NTV.AL, tri nga këto opsione kanë potencial shumë të dëmshëm për Kosovën. Nëse Kosova tërhiqet nga Marrëveshja e Parë, kjo mund të sjellë rënie në nivelin ndërkombëtar të saj dhe eskalime të reja. Nëse ndryshohet Kushtetuta, kjo mund të sjellë dobësim të strukturave të vendit. Ndërkohë që, nëse Kosova nuk bën asgjë, rezultati mund të jetë i ngjashëm me opsionin e parë, duke lejuar Serbinë të përfitojë nga status quo.