Redaksinë e babait e ktheu në ‘shtëpi bari’/ Si gazetari shpërndante drogë në zonën e ish-bllokut

Detaje të reja janë zbardhur nga operacionin antidrogë në kryeqytet, ku u godit një grup me 4 gazetarë të portalit ‘Publik.al’ me pronar Naim Noka. Mes të arrestuarve është edhe djali i Naimit, Ergis Noka, të cilit i është gjetur edhe bexha e gazetarit. Në hyrje të redaksisë, ngjitur në derë, ishte edhe një letër e ngjitur me shënimin “Redaksia”.

Kjo ka hedhur poshtë një pretendim të Naim Nokës në rrjetin social Facebook, ku ai thekson të kundërtën. Noka, përmes një postimi në rrjetet sociale ka shkruar se djali i tij nuk ka shitur ose përdorur lëndë narkotike, por ishte në shoqërinë e shokëve të tij në momentin e arrestimit. Më tej, ai sqaron publikun se zyra e reklamuar nuk është përdorur prej muajsh nga media që drejton. Por në derën e redaksisë qëndron shënimi për portalin ‘Publik.al’.

“Sqarim per lexuesit, kolegët dhe te gjithë dashamirësit dhe jo vetëm! Po e bëj këtë sqarim duke e botuar lajmin siç e kanë botuar te gjitha mediat edhe për djalin tim adoleshent E. N. Ju siguroj sipas infove që kam se djali im ishte i shoqëruar me shokët por nuk ka shitur apo perdour lende apo paisje dhe këtë do të vërtetojnë organet e drejtësisë. Dyqani apo zyra e reklamuar nuk ështe prej muajsh në përdorim të medias që unë drejtoj. Ju garantoj se paçka se bën lajm më shumë pse është ndaluar djali i nje drejtuesi medie nuk ndryshon asgjé në profesionin tim dhe në median që unë drejtoj. Ju uroj më të mirat!”, shkruan Noka.

Pamjet brenda portalit të kthyer në “shtëpi bari”

Në pamje dallohen pakot prej kartoni, brenda të cilave ishin vendosur kryesisht aspiratorë, llamba, portollamba, kabuj, tuba, rrjet elektrik dhe sende të tjera për trajtim dhe prodhim droge

Gjatë një operacioni të Policisë u arrestuan 4 persona, të cilët u kapën me 300 tableta ekstazie. Në pranga ranë Ergis Noka, Drin Vjerdha, Kristofor Pandelejmoni dhe Mario Çerra. Gjatë kontrolleve që ka kryer policia tek dyqani i Ergis Nokës u sekuestruan, 300 tableta narkotike e llojit ekstazi (MDMA). Gjithashtu u sekuestruan disa pajisje elektrike, të cilat përdoreshin për kultivimin e lëndës narkotike kanabis.