Rusia ka shumë për të humbur/ Pse Putin kërkon paqen mes Izraelit dhe Iranit

Kur Izraeli nisi Operacionin Rising Lion, zyrtarët në Rusi e përshkruan përshkallëzimin aktual në Lindjen e Mesme si “alarmues” dhe “të rrezikshëm”.

Megjithatë, mediat ruse nxituan të theksonin anët pozitive të mundshme për Moskën.

Midis tyre:

Një rritje e çmimeve globale të naftës, e cila parashikohet të rrisë arkat e Rusisë.

Shpërqendrimi i vëmendjes globale nga lufta e Rusisë kundër Ukrainës. “Kiev është harruar” ishte një titull në Moskovsky Komsomolets.

Dhe nëse oferta e Kremlinit për të ndërmjetësuar në konflikt do të pranohej, Rusia mund ta portretizonte veten si një lojtar kyç në Lindjen e Mesme dhe si një paqebërës, pavarësisht veprimeve të saj në Ukrainë.

Megjithatë, sa më gjatë të vazhdojë operacioni ushtarak i Izraelit, aq më i madh do të jetë kuptimi se Rusia ka shumë për të humbur nga ngjarjet aktuale.

“Përshkallëzimi i konfliktit mbart rreziqe serioze dhe kosto të mundshme për Moskën”, shkroi politologu rus Andrei Kortunov në të përditshmen e biznesit Kommersant.

“Fakti mbetet se Rusia nuk ishte në gjendje të parandalonte një sulm masiv nga Izraeli ndaj një vendi me të cilin pesë muaj më parë Rusia nënshkroi një partneritet strategjik gjithëpërfshirës”.

“Është e qartë se Moska nuk është e përgatitur të shkojë përtej deklaratave politike që dënojnë Izraelin, nuk është e gatshme t’i ofrojë Iranit ndihmë ushtarake”.

Marrëveshja e partneritetit strategjik ruso-iranian që Vladimir Putin dhe Presidenti Masoud Pezeshkian nënshkruan më parë këtë vit nuk është një aleancë ushtarake.

Ajo nuk e detyron Moskën të dalë në mbrojtje të Teheranit.

Megjithatë, në atë kohë, Moska e nxori në pah.

Në një intervistë me agjencinë e lajmeve Ria Novosti, Ministri i Jashtëm Sergei Lavrov vuri në dukje se marrëveshja i kushtoi “vëmendje të veçantë forcimit të koordinimit në interes të paqes dhe sigurisë në nivel rajonal dhe global, dhe dëshirës së Moskës dhe Teheranit për bashkëpunim më të ngushtë në siguri dhe mbrojtje”.

Në gjashtë muajt e fundit, Moska ka humbur tashmë një aleat kyç në Lindjen e Mesme, Bashar al-Assad.

Pasi udhëheqësi sirian u rrëzua dhjetorin e kaluar, atij iu ofrua azil në Rusi. Perspektiva e ndryshimit të regjimit në Iran, mendimi i humbjes së një partneri tjetër strategjik në rajon, do të jetë një shqetësim i madh për Moskën.

Duke komentuar mbi zhvillimet në Lindjen e Mesme, Moskovsky Komsomolets, doli në përfundimin se “në politikën globale tani, po ndodhin ndryshime masive në kohë reale të cilat do të ndikojnë në jetën në vendin tonë, qoftë drejtpërdrejt ose tërthorazi”.

Putin do të kalojë pjesën më të madhe të kësaj jave në Shën Petersburg, ku qyteti po pret Forumin e tij vjetor Ekonomik Ndërkombëtar.

Eventi dikur quhej Davosi i Rusisë, por nuk vlen më tani.

Në vitet e fundit, drejtuesit ekzekutivë të kompanive të mëdha perëndimore kanë qëndruar larg – veçanërisht që nga pushtimi i plotë i Ukrainës nga Rusia.

Megjithatë, organizatorët pretendojnë se këtë vit do të marrin pjesë përfaqësues nga më shumë se 140 vende dhe territore.

Autoritetet ruse pothuajse me siguri do ta përdorin këtë ngjarje për të treguar se përpjekjet për të izoluar Rusinë për shkak të luftës në Ukrainë kanë dështuar.

Mund të jetë një forum ekonomik, por gjeopolitika nuk është kurrë larg.

Marrë nga “BBC”, përshtatur për “Albanian Post”.