Scholz: Marrëveshja Kosovë -Serbi e ngjashme me eksperiencën e Gjermanisë kur ishte e ndarë

Kancelari i Gjermanisë Olaf Scholz në një konferencë për media, ka folur në hollësi për marrëveshjen Kosovë -Serbi duke thënë se ajo bazohet në modelin e Gjermanisë kur ishte i ndarë. “Mendoj se deri tani janë arritur shumë marrëveshje. Herën e fundit ka pasur një marrëveshje te bazuar në kritere të bashkëpunimit themelor që është mjaftë e ngjashme me eksperiencën e Gjermanisë kur ishte e ndarë, por që ndihmoi që njerëzit dhe bizneset ta kenë jetën më të lehtë dhe për të gjitha gjërat që janë praktike për jetën e përditshme. Mendoj se këtë duhet të zgjedhim tani dhe shansi është tani që ta marrim këtë dhe se për këtë po punojmë” ka theksuar Kancelari. Ai ka folur edhe për implementimin e marrëveshjeve të arritura më herët duke përmendur “Asociacionin e Komunave me shumicë serbe në veri të Kosovës, bashkëpunimin e tyre dhe çështje të ngjashme”. Scholz ka theksuar se Berlini, Brukseli, Parisi, Roma dhe Uashingtoni kanë vullnet të fortë për ta zgjidhur konfliktin Kosovë -Serbi. “Më lejoni t’ju siguroj se është një vullnet strikt i qeverisë time, BE’së i francezëve, italianëve, qeverisë së SHBA’së për ta zgjidhur këtë konflikt dhe për ta hapur rrugën për një të ardhme më të mirë për dy shtetet, të dyja si anëtarë të BE’së” – ka deklaruar kancelari Scholz.