Sekretari amerikan i Mbrojtjes, Hegseth: Ta quash Trump-in pro-Rusi, është marrëzi

“Është marrëzi të thuhet se Donald Trump është pro-Rusi”, kështu është shprehur sekretari amerikan i mbrojtjes, Pete Hegseth.

Hegseth deklaroi se presidenti amerikan mbetet i përqendruar fuqimisht në sigurimin e paqes në Ukrainë, pavarësisht kritikave mbi marrëdhënien e tij me Vladimir Putinin.

Këto komente u bënë gjatë takimit të Hegseth me John Healey, homologun e tij britanik, në Pentagon të enjten, thotë The Telegraph.

Healey ishte në një vizitë në Uashington vetëm një javë pas udhëtimit të Sir Keir Starmer, ndërsa Britania përpiqet të veprojë si një urë diplomatike midis SHBA-së dhe Europës lidhur me planet për paqen në Ukrainë.

Hegseth u bë më energjik gjatë takimit, duke këmbëngulur se Trump nuk po mban anën e Putinit.

“Presidenti ynë është i interesuar për paqen. Kështu që do të karakterizohemi në një mënyrë ose në një tjetër. Oh, qëndrimi juaj është pro-Rusi ose pro, është gjithë kjo marrëzi.

Presidenti u zgjodh për të sjellë paqe në këtë konflikt dhe ai po punon me të dyja palët në një mënyrë që vetëm presidenti Trump mundet. Të jemi të qartë, vetëm presidenti Trump mund t’i sjellë ata në tryezë për t’i dhënë fund vrasjeve, dhe unë mund t’ju them nga përvoja personale se ai është plotësisht i përqendruar për ta bërë këtë të ndodhë dhe jemi më pranë sot se kurrë më parë falë udhëheqjes së tij.”

I pyetur për perspektivën që fronti ukrainas të bjerë pas vendimit të Trump-it për të ndërprerë ndihmën ushtarake, Hegseth tha se departamenti i tij po monitoron nga afër trupat dhe se në fund të fundit ishte “i interesuar për krijimin e kushteve për paqe”.

Healey, i cili ishte i shoqëruar nga Lord Mandelson, ambasadori britanik në SHBA, dhe admirali Sir Tony Radakin, Shefi i Shtabit të Mbrojtjes, tha gjithashtu se Mbretëria e Bashkuar ishte e përqendruar në sigurimin e një marrëveshjeje paqeje.

Ai tha: “Askush që ka qenë në Ukrainë, që ka folur me Ukrainën, që ka punuar me udhëheqësit ukrainas, ose që ka takuar ushtarët dhe ushtaraket ukrainase, apo civilët, nuk beson se ata nuk do të luftojnë, as unë dhe as kryeministri nuk dyshojmë për këtë, ashtu siç ka thënë presidenti Zelensky, ata janë gati të nënshkruajnë marrëveshjen e rëndësishme ekonomike me SHBA-në. Ata janë gati për një armëpushim.”

Vizita e Healey erdhi si pjesë e përpjekjeve të Britanisë për të rivendosur marrëdhënien midis Volodymyr Zelensky-t dhe Trump-it pas takimit të tyre të dështuar në Zyrën Ovale javën e kaluar.