Serbia me Millosheviçin në krye dhe me Rusinë në prapavijë

Serbia do të mbajë zgjedhje të jashtëzakonshme parlamentare në 17 dhjetor, të dytat në më pak se dy vjet. Edhe pse Aleksandër Vuçiç, si president i Serbisë, dhe Partia e tij Progresive Serbe (SNS), së bashku me partnerët e tyre të koalicionit, kanë një shumicë të qëndrueshme në Parlamentin serb dhe në shumë komuna, ata megjithatë kanë vendosur të shpallin zgjedhje të jashtëzakonshme. Vlerësimet janë se zgjedhjet e reja vështirë se do të forcojnë praninë e Vuçiqit në Parlament dhe se ai me siguri nuk do të fitojë më shumicën. Mbi të gjitha, ka një probabilitet të lartë që koalicioni pro-qeveritar të humbasë Beogradin, ku opozita properëndimore po fiton terren. Për të parandaluar një fitore të opozitës në kryeqytet, Vuçiç u detyrua të ndërmerrte një hap që deri tani e kishte shmangur me kujdes – Partia Progresive Serbe (SNS), së bashku me Partinë Radikale Serbe (SRS) të Vojislav Sheshel, do të dalin në zgjedhjet në Beograd dhe disa komuna të tjera. Zoran Stojiljkoviç, profesor në Fakultetin e Shkencave Politike të Beogradit, tha se ky lloj bashkëpunimi vendoset për të ruajtur pozitën dhe për të shmangur humbjen e votave. Edhe pse presidenti serb u tha gazetarëve se nuk kishte mundësi që Partia Progresive Serbe (SNS) të formonte një qeveri me radikalët, të cilët janë ashpër kundër integrimit evropian të Serbisë dhe në favor të bashkëpunimit të ngushtë me Federatën Ruse, lideri i radikalëve i tha TV Happy se Partia Radikale Serbe (SRS) ishte gati të hynte në qeveri “nëse nevojitet një koalicion më i gjerë në nivel republikan, nëse progresistët nuk mund të formojnë një qeveri vetë ose së bashku me socialistët”. Kurse nga ana tjetër Vucic u shpreh: Ne mendojmë se Serbia duhet të mbrojë rrugën e saj evropiane dhe marrëdhëniet e saj tradicionale me Rusinë dhe Kinën” Në të njëjtën kohë, zgjedhjet u japin autoriteteve serbe justifikim për të shtyrë negociatat me Perëndimin për një kompromis me Kosovën dhe sanksione kundër Rusisë. Zgjedhjet e mëparshme parlamentare në Serbi u mbajtën një vit e gjysmë më parë, në prill 2022. Si rezultat i këtyre zgjedhjeve, Partia Progresive Serbe (SNS) e Vuçic mbeti pa shumicë dhe u detyrua të krijojë një koalicion me aleaten e saj tradicionele, Partinë Socialiste te Serbisë. Megjithatë, për gjashtë muaj pas këtyre zgjedhjeve, nuk ishte e mundur të formohej një qeveri e plotë, dhe kjo u bë vetëm në fund të vitit të kaluar. Dëshira për të përsëritur këtë manovër është një nga arsyet për këto zgjedhje të reja të jashtëzakonshme – Vuçiq ende beson se Perëndimi do të ngopet me luftën në Ukrainë dhe do të shkojë në negociata paqeje. Kjo do të thotë se ekziston mundësia e shtyrjes dhe mos vendosjes së sanksioneve ndaj Rusisë, për të mos prishur marrëdhëniet me Kremlinin. Falë zgjedhjeve të jashtëzakonshme, autoritetet serbe kanë mundësinë që çështjet e pakëndshme t’i shtyjnë deri në mesin e vitit të ardhshëm.