Shqiptarë heqin dorë nga gomonet, paguajnë 23 mijë paund për të shkuar në Angli me kamion

Trafikantët kanë zhvilluar taktika të reja për kontrabandimin e shqiptarëve në Mbretërinë e Bashkuar që kur u nënshkrua marrëveshja me kryeministrin shqiptar në vitin 2022. Shqiptarët janë të gatshëm të paguajnë deri në 23,000 £ për t’u kontrabanduar në Mbretërinë e Bashkuar në pjesën e pasme të një kamioni për të shmangur zbulimin nga Forcat Kufitare të Mbretërisë së Bashkuar. Kështu, numri i shqiptarëve që mbërrijnë me varka të vogla ka rënë nga 12658 në 2022 në 616 vitin e kaluar.

Shqiptarët janë kombësia më e madhe që janë zbuluar në pjesën e pasme të automjeteve që futen në Mbretërinë e Bashkuar. Por kontrabandistët e njerëzve po përdorin gjithashtu taktika të reja për të shmangur zbulimin në mediat sociale duke maskuar reklamat e tyre për rrugët ilegale në Britani si artikuj lajmesh.

“The Times” gjeti individë që paguanin deri në 23,000 £ për një vend në një kamion. Reklamat e postuara në TikTok ofrojnë një paketë të gjerë për emigrantët që përfshin gjithashtu edhe punën për grupe të krimit të organizuar në fermat e kanabisit ose për grabitje. Në objektiv kanë futbollistët e “Premier League”. Emiliano Krosi, 24 vjeç, një shqiptar, u dënua me 11 vjet burg në nëntor për përfshirjen e tij në 33 vjedhje. Krosi bashkë me shokët e tij ishin të përfshirë në një seri grabitjesh në shtëpitë e futbollistëve të Premier League, si psh. Raheem Sterling dhe Marc Cucurella.

Edhe pse TikTok është bërë gjithnjë e më i aftë në heqjen e reklamave të tilla, kontrabandistët thjesht hapin llogari të reja dhe kërkojnë që “klientët” t’i dërgojnë mesazhe në WhatsApp, ku mund të mos zbulohen. Një person i brendshëm me njohuri për bandat e kontrabandës së njerëzve shqiptarë tha për “The Times” se ata kishin ndërruar taktika pas ndryshimit të ligjit në 2023, në mënyrë që Shqipëria të konsiderohet një vend i sigurt.

“Mbërritja me varka të vogla do të thotë se ata do të dërgohen në qendrat e paraburgimit dhe brenda pak ditësh do të deportohen përsëri në Shqipëri. Ata e dinë se dhe për të shmangur çdo kontakt me autoritetet e emigracionit, ata po përdorin kamionë. Kjo ka rritur çmimin nga 18,000 £ në 2023-24 në 23,000 £,”-thotë personi i brendshëm i bandës për median britanike.

Një llogari e TikTok e quajtur shqipet_london — “Albanian London” — postoi një seri reklamash muajin e kaluar. Një nga reklamat, e përkthyer nga shqip, thoshte: Udhëtim me kamion për të gjitha ata që na presin në Bruksel. Kemi një udhëtim çdo ditë. Siguri 100 për qind me shoferë kamionësh polakë dhe britanikë. Për djemtë me probleme [të kërkuar për krime në BE], na dërgoni një SMS. Ne jemi dora e parë e kësaj punë.

Një tjetër tha: Nesër kemi një kamion me hapësirë për 4 persona. Udhëtimi fillon në mbrëmje, kush është gati të shkojë në MB?

Ndërsa një i tretë shkroi: Rezervoni direkt me ne dhe jo me ndërmjetësit. Ne jemi të dorës së parë në këtë biznes. Kalim i sigurtë 100 për qind. Pagesa kur të mbërrini në Londër.

Kur u kontaktuan në TikTok nga një gazetar që tregonte interes për të shkuar në Mbretërinë e Bashkuar, ata dhanë një numër në Mbretërinë e Bashkuar, duke thënë: Lidhuni në WhatsApp.

Në ëhatsApp, kontrabandisti bëri një ofertë: Në pjesën e pasme të kamionit 23.000. Duhet të shkoni në Bruksel. Do të na paguani vetëm kur të mbërrini në Angli.

Një zëdhënës i TikTok tha se në rrjet nuk lejojnë asnjë përmbajtje që lehtëson ose bashkërendon kontrabandën me qenie njerëzore dhe se ai punëson staf shumëgjuhësh për të hequr videot në kundërshtim me rregullat e vendosura nga aplikacioni.