Shqiptarët më mos-besuesit në Europë, vetëm 2.8% i besojnë tjetrit

Qytetarët shqiptarë janë populli që i besojnë më pak njëri-tjetrit në të gjithë Evropën. Bëhet fjalë për përqindjen e popullsisë në Evropë e cila pajtohet se “shumicës së njerëzve mund t’u besohet”. Vlerat më të larta u regjistruan në vendet skandinave, ndërsa më të ulëtat në Ballkan. Në Shqipëri vetëm 2.8 për qind e të anketuarve pajtohen, me mbi 97 për qind që në vend të kësaj pajtohen se “nuk mund të jesh shumë i kujdesshëm”. Danezët janë populli më në mirëbesim në Evropë, ku 74 për qind e të anketuarve u pajtuan se mund t’u besohet shumicës së njerëzve. Ky ishte përfundimi i dy programeve kërkimore Studimi i Vlerave Evropiane (EVS) dhe Anketa e Vlerave Botërore (WVS). Të dyja programet përfshijnë një numër të madh pyetjesh, të cilat janë përsëritur që nga fillimi i viteve tetëdhjetë. Kujtojmë se besimi te njerëzit e tjerë ishte relativisht i lartë në 14 ekonomi të përparuara të anketuara nga Pew Research Center verën e vitit 2020. Por ndërsa një mesatare prej 62 për qind e të rriturve në këto vende përgjithësisht besojnë se shumicës së njerëzve mund t’u besohet, ka dallime domethënëse në këto pikëpamje sipas moshës, arsimit dhe faktorëve të tjerë, sipas një analize të re të gjetjeve nga sondazhi. Në përgjithësi, besimi personal është më i lartë në Danimarkë, ku 86 për qind thonë se shumica e njerëzve në përgjithësi mund të besohen. Shumica në 10 vende të tjera pajtohen, duke përfshirë rreth shtatë në dhjetë ose më shumë në Holandë, Kanada, Suedi, Australi dhe Britani. Njerëzit janë më të ndarë në Spanjë dhe Francë, ku respektivisht 53 për qind dhe 50 për qind, thonë se shumica e njerëzve të tjerë mund të besohen.