Si fillim do tju vë tarifa të dyfishta, pastaj do tju bombardojë/ Trump për marrëveshjen e munguar bërthamore me Iranin

Presidenti amerikan, Donald Trump, ka kërcënuar Iranin me bombardime dhe tarifa të reja ekonomike nëse Teherani nuk arrin një marrëveshje me Uashingtonin për programin e tij bërthamor.

Në një intervistë telefonike për NBC News të dielën, Trump tha se zyrtarët amerikanë dhe iranianë po zhvillojnë bisedime, por nuk dha detaje të mëtejshme.

“Nëse nuk arrijnë një marrëveshje, do të ketë bombardime”, deklaroi Trump. “Por ka një mundësi që, nëse nuk bëjnë një marrëveshje, unë do t’u vendos tarifa të dyta, ashtu siç bëra katër vjet më parë”.

Gjatë mandatit të tij të parë (2017-2021), Trump e tërhoqi SHBA-në nga marrëveshja e vitit 2015 midis Iranit dhe fuqive botërore, e cila vendoste kufizime të rrepta mbi aktivitetet bërthamore të Teheranit në këmbim të lehtësimit të sanksioneve.

Ai gjithashtu rivendosi sanksione të ashpra ndaj Iranit. Si pasojë, Republika Islamike ka tejkaluar kufijtë e dakordësuar, duke përshkallëzuar programin e saj të pasurimit të uraniumit.

Irani ka refuzuar deri tani paralajmërimin e Trump-it për të arritur një marrëveshje ose për të përballuar pasoja ushtarake.

Ministri i Jashtëm iranian, Abbas Araqchi, cituar nga agjencia shtetërore IRNA, deklaroi të enjten se Teherani i është përgjigjur përmes Omanit një letre të dërguar nga Trump, në të cilën ai e nxiste Iranin të negocionte për një marrëveshje të re bërthamore.

Fuqitë perëndimore akuzojnë Iranin se po përpiqet fshehurazi të zhvillojë armë bërthamore duke pasuruar uranium në nivele të larta pastërtie, përtej asaj që do të ishte e justifikueshme për një program civil të energjisë bërthamore.

Nga ana tjetër, Teherani këmbëngul se programi i tij bërthamor ka vetëm qëllime paqësore dhe është i dedikuar ekskluzivisht për prodhimin e energjisë.

…

Irani ka refuzuar zyrtarisht çdo mundësi për negociata të drejtpërdrejta me Shtetet e Bashkuara mbi programin e tij bërthamor, njoftoi te dielën presidenti i vendit, Masoud Pezeshkian, raporton CNN. Ky është reagimi i parë zyrtar nga Teherani pas letrës së Donald Trump drejtuar liderit suprem të Iranit, Ayatollah Ali Khamenei.

Sipas presidentit iranian, përgjigja e Iranit është përcjellë përmes Sulltanatit të Omanit dhe lë të hapur mundësinë e bisedimeve indirekte me Uashingtonin. Megjithatë, siç sqaroi ai, këto përpjekje nuk kanë sjellë asnjë rezultat të prekshëm që nga viti 2018, kur Trump tërhoqi në mënyrë të njëanshme SHBA-në nga marrëveshja për programin bërthamor të Iranit.

Situata është përkeqësuar në mënyrë dramatike vitet e fundit, me një sërë sulmesh në det dhe në tokë duke intensifikuar tensionet rajonale. Konflikti midis Izraelit dhe Hamasit në Rripin e Gazës implikoi më tej Iranin, pasi Izraeli synonte figurat kryesore të të ashtuquajturit “Boshti i Rezistencës”, të cilin Teherani e mbështet. Në të njëjtën kohë, sulmet ajrore të SHBA-së kundër rebelëve shiitë Houthi të mbështetur nga Irani në Jemen po ringjallin skenarët e veprimeve ushtarake kundër programit bërthamor iranian.

“Ne nuk i shmangemi dialogut. Ajo që na ka shkaktuar probleme deri tani është shkelja e premtimeve. Ata duhet të provojnë se mund të fitojnë besimin tonë”, u shpreh presidenti iranian.

Letra e Trump, dërguar më 7 Mars, erdhi pasi Izraeli dhe SHBA kanë paralajmëruar se nuk do ta lejojnë Iranin të marrë armë bërthamore, duke rritur frikën e një konfrontimi ushtarak. Irani pohon se programi i tij është për qëllime paqësore, edhe pse zyrtarët kërcënojnë gjithnjë e më shumë.