Sinjal i qartë për Kosovën/ Gazeta gjermane ngre alarmin

Gazeta gjermane Bild ka bërë një analizë mbi situatën e brishtë të sigurisë dhe stabilitetit në Ballkan, ku sipas saj, sinjalet e dhëna mund të jenë pjesë e “një planifikimi rus për të nisur një luftë të re në rajon”, dhe këtë “po e bën përmes Serbisë”.

Ekspertët e Ballkanit, sipas BILD, paralajmërojnë se Putin po planifikon një luftë të re në Ballkan, para zgjedhjeve të Parlamentit Evropian dhe këtë “fushë beteje” e shikojnë në Kosovë.

“Putin do të krijojë një fushë të dytë beteje në Ballkan përpara zgjedhjeve evropiane me ndihmën e presidentit serb” – shkruan Bild.

Eksperti serb Jakov Devçiç, kreu i zyrës së jashtme të Serbisë/Malit të Zi të Fondacionit Konrad Adenauer, të lidhur me CDU, tha se ka rryma të qarta pro-ruse në peizazhin politik serb dhe kjo u pa edhe në marrëveshjet e bashkëpunimit nënshkruar mes Serbisë dhe Rusisë që pas nisjes së luftës në Ukrainë.

“Sinjali i qartë: Në margjinat e Asamblesë së Përgjithshme të OKB-së, ministrat e jashtëm të Serbisë dhe Rusisë nënshkruajnë një marrëveshje për bashkëpunimin e ardhshëm – gjashtë muaj pas sulmit të Rusisë ndaj Ukrainës. Serbia ende nuk po merr pjesë në sanksionet e BE-së kundër Rusisë. Në maj 2023: Aleksandër Vulin (ish-shefi i inteligjencës) dhe Ivica Daçiç (ministër i Jashtëm) përfaqësuan Serbinë në konferencën e sigurisë në Moskë. Ka rryma të qarta pro-ruse në peizazhin politik serb. Të dy, Vulin dhe Daçiç përfaqësojnë pozicione pro-ruse” – theksoi eksperti serb Jakov Devçiç.

Bild shkruan se “Teksa Vulin dhe Daçiç ishin në Moskë, pati trazira serioze mes ushtarëve të KFOR-it dhe serbëve të Kosovës në veri të vendit. 30 ushtarë nga aleanca perëndimore u plagosën.

Tensionet u eskaluan kur 30 paraushtarakë serbë të armatosur rëndë sulmuan oficerët e policisë në veri të Kosovës në shtator 2023. Paskësaj Vuçiç dislokoi trupat në kufi”.

Në analizë theksohet edhe mungesa e Vuçiç në samitin BE-Ballkan në tetor 2023, pasi ai udhëtoi në Kinë dhe u takua me Putinin. Këtë fillim viti, Serbia shpalli rivendosjen e shërbimit të detyrueshëm ushtarak, për të cilën, analiza e Bild ngre pyetjen nëse është mobilizim I përgjithshëm ushtarak.

“Situata në Ballkanin Perëndimor në përgjithësi është shumë e brishtë. Pa u rritur prania perëndimore në veri të Kosovës, nuk do të ketë paqe dhe siguri në Ballkanin Perëndimor” – theksoi eksperti Jakov Devçiç.