Situata në veri/ Musliu tregon skenarin e Serbisë

Drejtori i Institutit ‘Octopus’, Agim Musliu, tha se situata e krijuar në veri të vendit është skenari i Serbisë për të larguar Policinë e Kosovës nga komunat veriore.

Ai ngriti shqetësimin se në protestat e serbëve në veri të vendit po marrin pjesë rreth 350 ish-pjesëtarë serbë të Policisë së Kosovës, të cilët kanë me vete armatimin e Republikës të Kosovës, që nuk e kanë dorëzuar pas dorëheqjes.

Musliu komentoi edhe kërcënimet e ministrit të Jashtëm të Serbisë, Ivica Daçic për gatishmërinë e ushtrisë serbe, dhe dislokimin e ushtrisë nga Vuçici.

Sipas tij, kërcënimet e Serbisë dhe situata e krijuar në veri të vendit do të zgjasë derisa të mos ushtrohet presion ndaj Aleksandër Vuçic.

“Vucic, gënjeshtari më i madh i rruzullit tokësor deri më sot, për këto vite sa është në pushtet mbi 3 mijë herë ka përdorur fjalën ‘luftë’ dhe ka kërcënuar me luftë. Nuk është çudi edhe që tani ka marr vendim të dislokojë ushtrinë serbe në kufi me Kosovën… Për tërë këto vite bashkësia ndërkombëtare na ka penguar në shtetformimin e plotë të Republikës të Kosovës dhe në përmbushjen e kapaciteteve të saj. Prandaj, unë them se ata janë përgjegjës edhe për zmbrapsjen e së keqes që i kanoset Kosovës” – u shpreh Agim Musliu duke shtuar se nëse trupat ushtarake serbe do afrohen në kufi, do të përballet me forcat e NATO-s.