Skandali i mesazheve në Signal, Mike Waltz nën presion për të dhënë dorëheqje

Këshilltari i Sigurisë Kombëtare i SHBA-ve, Mike Waltz është nën presion për të dhënë dorëheqjen. Sipas një artikulli nga Wall Street Journal, Waltz e përdori aplikacionin “Signal” për të diskutuar operacionet ushtarake dhe perspektivat për paqen në luftën midis Rusisë dhe Ukrainës.

Sipas gazetarit Alexander Ward, duke cituar zyrtarë anonimë amerikanë, Waltz e përdori aplikacionin për çështjet ushtarake dhe mënyrat për të arritur një zgjidhje paqësore midis Moskës dhe Kievit. Reagimet brenda Shtëpisë së Bardhë janë intensive. Sipas Politico, nënpresidenti i SHBA J.D. Vance dhe shefja e personelit të Shtëpisë së Bardhë Susie Wiles thuhet se kanë këshilluar privatisht Presidentin Donald Trump të largojë Waltz për shkak të skandalit të fundit.

Trump mbështet Walz pavarësisht presionit

Pavarësisht presionit të brendshëm, Presidenti Trump deklaroi se nuk ka ndërmend të shkarkojë asnjë anëtar të ekipit të tij për shkak të skandalit që shpërtheu në lidhje me përfshirjen e kryeredaktorit të The Atlantic në një bisedë private Signal, në të cilën u diskutuan planet për të sulmuar Houthi-t në Jemen.

Çështja “Signal” ka shkaktuar bujë politike, ndërkohë që po shtohen pikëpyetjet për trajtimin e informacioneve delikate në kanale komunikimi jozyrtare dhe të vështira për t’u kontrolluar nga zyrtarë të administratës Trump.