Spiropali vizitë zyrtare në Kosovë/ Kurti: Kosovë-Shqipër kultivojnë marrëdhënie vëllazërore

Kryeministri i Kosovës, Albin Kurti e ka pritur në një takim në zyrën e tij kryeparlamentaren Elisa Spiropali. Mësohet se Kurti i është drejtuar Spiropalit duke i thënë se Kosova dhe Shqipëria kultivojnë marrëdhënie vëllazërore të cilat shprehen në çdo aspekt.

“Na bëhet shumë qejfi që e keni përzgjedhur Kosovën si vizitë të parë zyrtare. Kosova dhe Shqipëria kultivojnë marrëdhënie vëllazërore të cilat shprehen në çdo aspekt të ekonomisë, sigurisë, mbrojtjes, arsimit, kulturës, tregtisë, por edhe të dy kuvendeve tona si vendet ku përfaqësohet populli për politika të cilat i shërbejnë popullit tonë”, thotë Kurti.

Nga ana tjetër, Spiropali ka thënë se niveli i bashkëpunimit mes parlamenteve është intensifikuar vitet e fundit.

“Është me shumë rëndësi për ne të theksojmë që si në nivelin e bashkëpunimit mes parlamenteve tona, mes kuvendeve tona, marrëdhënie, bashkëpunim i cili është intensifikuar vitet e fundit dhe duhet theksuar”, tha Spiropali.

Kryeparlametarja u takua me homologun e saj Glauk Konjufca, duke mbajtur një konferencë të përbashkët për media pas takimit. Konjufca u shpreh nga ana e tij se qytetarët e Kosovës nuk e shohin Shqipërinë si shtet fqinj, por si shtet amë.

“Unë nuk mendoj që asnjëherë ne kemi pasur ndonjë një ngrirje mes Republikës së Shqipërisë dhe Kosovës. Ne si përfaqësues të institucioneve gjithmonë kemi qenë në nivelin e detyrë, mundësisht për ta transmetuar një ndjenjë, e cila është shumë e thjesht dhe është mes popujve tonë, kjo është ndjenja e dashurisë, e vëllazërisë, një ndjenjë shumë e afërt të cilën mund ta ketë një popull mes vete. Kështu kanë vepruar unë mendoj edhe qeveritë dhe nëse ju dëshironi që ndonjë një mos pajtim eventual të kryeministrave apo të qeverive ta paraqisni si diçka që reflekton marrëdhëniet e dy shteteve, unë mendoj që kjo nuk qëndron fare”, tha Konjufca.