Starmer: Jo vetëm e ardhmja e Ukrainës, në lojë edhe çështja ekzistenciale për Evropën në tërësi

Kryeministri britanik Keir Starmer deklaroi se “në lojë nuk është vetëm e ardhmja e Ukrainës, është një çështje ekzistenciale për Evropën në tërësi”.

Lajmi u bë i ditur pas një samiti jozyrtar të liderëve evropianë për të diskutuar situatën në Ukrainë dhe sigurinë evropiane, në Pallatin Élysée në Paris.

“Vetëm një paqe e qëndrueshme në Ukrainë që ruan sovranitetin e saj do ta pengojë Putin-in nga agresioni i mëtejshëm”, thotë ai.

Starmer u shpreh se komentet e Trump që i kërkon Evropës të rritet “nuk duhet të jenë befasuese” dhe thotë se “evropianët do të duhet të rriten, si në aspektin e shpenzimeve ashtu edhe në aftësitë që ne i ofrojmë Ukrainës”.

Kryeministri përsëriti se ai është i përgatitur të marrë në konsideratë angazhimin e forcave britanike në terren së bashku me të tjerët.

Ai thotë se përgjigja evropiane është në fazat e hershme dhe se synon ta diskutojë më tej me presidentin amerikan Trump gjatë vizitës së tij në Washington DC javën e ardhshme.

“Në këtë moment, ne duhet të njohim epokën e re në të cilën jemi, duke mos u kapur pa shpresë pas komoditeteve të së kaluarës. Është koha që ne të marrim përgjegjësinë për sigurinë tonë, për kontinentin tonë”, ravijëzoi ai.

Starmer këmbëngul se çdo garanci që i ofrohet Ukrainës duhet të përfshijë një mbështetje të SHBA-ve pasi ai thotë se kjo është “mënyra e vetme” për të penguar në mënyrë efektive Rusinë nga sulmet e ardhshme.