Sulm me raketa në Rusi: Shpërthime të shumta tronditën Rostovin

Herët në mëngjes, shpërthime të shumta tronditën qytetin e Taganrog në rajonin Rostov të Rusisë, njoftoi guvernatori rajonal Yuriy Slyusar, duke e përshkruar sulmin si një “sulm me raketë”. Sulmi, siç shkruan Kyiv Post, u raportua rreth orës 4:20 të mëngjesit dhe aktivizoi sistemet e mbrojtjes kundërajrore dhe shkaktoi të paktën dhjetë shpërthime, thanë banorët vendas për kanalin Shot Telegram. Dëshmitarët okularë sugjeruan se objektivi mund të ketë qenë një aeroport ushtarak, transmeton kanali Telegram ČEKA-OGPU.

Në sulm është dëmtuar një ndërmarrje industriale dhe janë djegur 14 vetura, ka konfirmuar Sljusar, duke shtuar se përkundër dëmeve të mëdha, nuk ka të lënduar. Autoritetet lokale, të udhëhequra nga kryebashkiaku i Taganrog, Svetlana Kambulova, rrethuan zonën brenda një rrezeje prej një kilometri për inspektime sigurie. Është prekur edhe kaldaja në rrugën Ciolkovskigo, duke lënë pa ngrohje 27 objekte banimi. Nxehtësia pritet të rikthehet në mesditë.

Në rrjetet sociale u tha se Rusia ishte në shënjestër të raketave amerikane ATACMS me rreze të gjatë veprimi. Në një incident të veçantë të njëjtën natë, dronët ukrainas thuhet se sulmuan rajonin Bryansk të Rusisë, raportoi guvernatori Alexander Bogomaz. Banorët përshkruan se kishin dëgjuar një duzinë shpërthimesh, njëri prej të cilëve dyshohet se shkaktoi një zjarr në një ndërtesë industriale.

Kanali Astra Telegram pretendon se ndër vendet e prekura është stacioni i gazit të tubacionit të naftës Druzhba në fshatin Sven, 20 kilometra larg Bryansk. Ekipet e emergjencës kanë shuar zjarrin. Ministria ruse e Mbrojtjes njoftoi se mbrojtja ajrore ka kapur dhe shkatërruar 14 dronë ukrainas në Bryansk, por nuk ka adresuar sulmin në Taganrog.