Sulme të reja në Rripin e Gazës, raportohet për 28 viktima/ OKB miraton planin ndërkombëtar të paqes

Përshkallëzimi vjen pak pasi forcat izraelite bombarduan një kamp refugjatësh në Liban, duke shkaktuar viktima të tjera. Të martën, Hamasi kreu një sulm në zonën e Gush Etzion, në jug të Jerusalemit, ku mbeti i vrarë një person dhe u plagosën tre të tjerë.

Ndërkohë, në planin diplomatik, përpjekjet ndërkombëtare për zgjidhjen e konfliktit kanë hyrë në “fazën e dytë”. Këshilli i Sigurimit i Kombeve të Bashkuara miratoi rezolutën e propozuar nga SHBA, e cila bazohet në planin e paqes të Presidentit Donald Trump për Gazën. Teksti, i riformuluar disa herë gjatë negocimeve, u miratua me 13 vota pro, ndërsa Kina dhe Rusia abstenuan.

Rezoluta parashikon krijimin e një force ndërkombëtare stabilizimi për Rripin e Gazës, me mandat për të garantuar sigurinë dhe për të çarmatosur Hamasin. Megjithatë, vetë Hamasi e ka refuzuar planin, duke e cilësuar “të rrezikshëm” dhe duke e interpretuar si “një përpjekje për vendosjen e Rripit nën autoritet ndërkombëtar”.

Situata në terren mbetet e paqëndrueshme, ndërsa komuniteti ndërkombëtar shpreson se faza e re e procesit të paqes mund të hapë rrugën për uljen e dhunës.