Duke folur në emisionin The Vince Show, Vance tha se “terrorizmi nuk është i lirë” dhe spekuloi se vandalizmi i vazhdueshëm është i organizuar.
Ai shtoi se fokusi duhet të jetë te “njeriu në majë që shkruan çekun” dhe jo te “ushtarët e thjeshtë” që shkatërrojnë makinat.
“Mendoj se, nëse e hetojmë deri në fund këtë çështje, do të zbulojmë se pas kësaj fushate qëndrojnë disa njerëz shumë të çmendur, shumë të rrënuar mendërisht, por edhe shumë të pasur të krahut të majtë,” tha ai.
Shefi ekzekutiv i Teslës, Elon Musk, ndau video të sulmeve përmes platformës X dhe tha se ishte tronditur nga “urrejtja dhe dhuna që vjen nga e majta”.
Aktivistët kanë organizuar protesta të quajtura “Tesla takedown” (Rrëzimi i Tesla-s) në mbarë botën, në shenjë kundërshtimi ndaj shkurtimit të vendeve të punës dhe shpenzimeve publike nën Departamentin e Efikasitetit Qeveritar (Doge) të Musk-ut.
Kjo agjenci ka anuluar gjithashtu disa programe humanitare jashtë vendit, përfshirë programin më të madh në botë kundër HIV-it në Afrikën e Jugut.
Hakerët thuhet se kanë publikuar emrat, adresat dhe numrat e telefonit të pronarëve të Teslave në të gjithë SHBA-në në një hartë online. Aktivistët po u bëjnë presion pronarëve që të shesin automjetet e tyre. Faqja e internetit e lidhur me hartën dukej se ishte e padisponueshme kur u vizitua nga The Telegraph të mërkurën.
Më herët gjatë javës, Prokurorja e Përgjithshme Pam Bondi dënoi sulmet ndaj Teslës si “terrorizëm i brendshëm” dhe tha se disa persona tashmë janë akuzuar, me disa që përballen me një dënim minimal prej pesë vitesh burg.
Bondi tha: “Valët e sulmeve të dhunshme ndaj pronës së Teslës janë asgjë më pak se terrorizëm i brendshëm.
“Departamenti i Drejtësisë ka ngritur tashmë akuza kundër disa autorëve të këtyre veprave, përfshirë raste ku dënimi minimal i detyrueshëm është pesë vjet burg.
“Ne do të vazhdojmë hetimet për të vendosur ndëshkime të rënda ndaj atyre që janë të përfshirë në këto sulme, përfshirë ata që operojnë pas skene për të organizuar dhe financuar këto krime.”
Donald Trump e kishte quajtur tashmë dhunën ndaj Teslës “terrorizëm të brendshëm”. Ai i shprehu mbështetjen e tij “mikut të parë” Elon Musk duke premtuar publikisht në Shtëpinë e Bardhë javën e kaluar se do të blinte një makinë elektrike të Teslës. / The Telegraph
