Të gjithë sytë nga takimi Putin-Zelensky, por lideri rus ndryshon axhendë, fluturon drejt Pekinit

Presidenti rus Vladimir Putin do të zhvillojë bisedime me Presidentin Xi Jinping në Kinë javën e ardhshme, do të marrë pjesë në një samit sigurie dhe do të jetë “i ftuari kryesor” i Xi në një paradë ushtarake në sheshin Tiananmen të Pekinit, tha Kremlini të martën.

Putin do të jetë në Kinë, partnerin më të madh tregtar të Rusisë, nga 31 gushti deri më 3 shtator, u tha gazetarëve këshilltari i politikës së jashtme të Kremlinit, Yuri Ushakov, duke thënë se një udhëtim katër-ditor i këtij lloji është shumë i rrallë për udhëheqësin rus.

Dy ditët e para do t’i kushtohen një samiti të Organizatës së Bashkëpunimit të Shangait (SCO), i cili po zhvillohet në qytetin e Tianjin.

Ushakov tha më pas se Putini do të udhëtonte për në Pekin, ku pritet të zhvillojë bisedime me Xi dhe të marrë pjesë në një paradë ushtarake në sheshin Tiananmen më 3 shtator për të shënuar fundin e Luftës së Dytë Botërore pas dorëzimit zyrtar të Japonisë.

Ushakov tha se Putin do të marrë pjesë si “i ftuari kryesor” dhe do të ulet në të djathtë të Xi-t, ndërsa Kim Jong Un i Koresë së Veriut do të ulet në të majtë të Xi-t.

Takime edhe me Erdogan, Modi dhe Pesekian

Putin do të zhvillojë gjithashtu një sërë takimesh dypalëshe me udhëheqës të tjerë botërorë që ndodhen në Kinë në të njëjtën kohë, tha Ushakov.

Midis këtyre udhëheqësve do të jenë kryeministri indian Narendra Modi, presidenti iranian Masud Peskov dhe presidenti turk Tayyip Erdogan.

Takimi me udhëheqësin e Koresë së Veriut Kim Jong Un nuk është konfirmuar ende, por është duke u diskutuar, tha Ushakov.

Tre dokumente që përfshijnë Gazpromin do të nënshkruhen në Kinë, tha Ushakov, duke thënë se nuk mund të zbulonte detaje të mëtejshme mbi këtë çështje.

Tregtia Rusi-Kinë, e cila u rrit në nivele rekord ndërsa lufta në Ukrainë e la Moskën të izoluar, tani është në rënie, një trend që Putini po kërkon ta përmbysë, thanë tre burime ruse për Reuters përpara vizitës.