Të mbijetuarit e tërmetit në Mianmar pa ushqim dhe strehë ndërsa numri i viktimave rritet në 2700

Situata në Mianmar po bëhet gjithnjë e më dramatike pas tërmetit shkatërrues që goditi vendin javën e kaluar. Mes numrit të viktimave që ka shkuar në 2700 janë edhe të mbijetuarit të cilët po përballen me kushte të vështira. Rreth 6,7 milionë fëmijë jetojnë tashmë në një vend të shkatërruar nga uria dhe lufta civile, ku 32% e popullsisë jeton nën pragun e varfërisë.

“Duke jetuar terrorin e tërmetit, njerëzit tani kanë frikë nga pasgoditjet dhe po flenë jashtë në rrugë ose në fusha të hapura,” tha një punonjës i Komitetit Ndërkombëtar të Shpëtimit në Mandalay.

“Megjithatë, në qytete, hapësirat e sigurta janë të pakta. Ekziston një nevojë urgjente për tenda, pasi edhe ata shtëpitë e të cilëve mbeten të paprekura kanë shumë frikë të flenë brenda”, shtoi ai.

Lufta civile në Mianmar, ku junta mori pushtetin me një grusht shteti në vitin 2021, ka komplikuar përpjekjet për të arritur të plagosurit dhe të pastrehët nga tërmeti më i madh në Azinë Juglindore në një shekull.

Në Mandalay, një banor i tha Reuters se njerëzit po përpiqeshin dëshpërimisht të organizonin përpjekjet e tyre për të nxjerrë kufomat nga rrënojat pasi nuk kishte pajisje të mjaftueshme ose ekipe shpëtimi dhe vendasit ishin të kujdesshëm nga pasgoditjet.

“Njerëzit u kthyen brenda në ndërtesë gjatë ditës, por ende nuk guxonin të flinin natën,” tha banori.

Media shtetërore thotë se deri tani raportohet për 3,900 të plagosur dhe të paktën 270 të zhdukur. Ndërkohë qeveria shpalli një periudhë zie njëjavore nga e hëna.