Trondit drejtoresha e Inteligjencës Kombëtare të SHBA-ve: Irani mund të prodhojë armë bërthamore ‘brenda disa javësh’

Tulsi Gabbard thotë se Irani mund të prodhojë armë bërthamore “brenda disa javësh”, muaj pasi dëshmoi para Kongresit se vendi nuk po i ndërtonte.

Drejtoresha e Inteligjencës Kombëtare të SHBA-ve tha se dëshmia e saj në mars – në të cilën ajo tha se Irani kishte një stok materialesh, por nuk po i ndërtonte këto armë – ishte nxjerrë nga konteksti nga “media e pandershme”.

Ndryshimi i qëndrimit të saj erdhi pasi Presidenti amerikan Donald Trump tha se ajo ishte “gabuar” dhe se inteligjenca tregoi se Irani kishte një “sasi të jashtëzakonshme materiali” dhe mund të kishte një armë bërthamore “brenda disa muajsh”.

Irani sakaq ka thënë se programi i tij bërthamor është tërësisht paqësor dhe se nuk ka kërkuar kurrë të zhvillojë një armë bërthamore.

Të enjten, Trump tha se po i jepte Teheranit “maksimumin” prej dy javësh për të arritur një marrëveshje mbi aktivitetet e tij bërthamore me Washingtonin.

Ai tha se së shpejti do të vendoste nëse SHBA-të duhet t’u bashkohen sulmeve të Izraelit ndaj Iranit.

Më herët, Ministri i Jashtëm i Iranit, Abbas Araghchi, tha se vendi i tij ishte “absolutisht i gatshëm për një zgjidhje të negociuar” mbi programin e tyre bërthamor, por se Irani “nuk mund të kalojë nëpër negociata me SHBA-të kur populli është nën bombardime”.