Trump ruan traditën: Një gjeneral amerikan do të udhëheqë forcat e NATO-s në Evropë

Presidenti Donald Trump do të ruajë rolin tradicional të një gjenerali amerikan në krye të NATO-s, të paktën për momentin.

Kështu bën të ditur agjencia Reuters, duke cituar tre zyrtarë amerikanë, një zyrtar perëndimor dhe një burim nga NATO.

Vetë Trump ia komunikoi privatisht vendimin Sekretarit të Përgjithshëm të NATO-s Mark Rutte, shkruan Reuters.

Vendimi do të lehtësojë aleatët evropianë të NATO-s dhe madje edhe disa nga republikanët e Trump, mes shqetësimeve se fjalimet e ashpra të Washington-it për Evropën dhe skepticizmi për luftën në Ukrainë, mund të sinjalizojnë një tkurrje të shpejtë të udhëheqjes ushtarake të Amerikës.

Megjithatë, zyrtarët thonë se paralajmërimet e SHBA-ve se administrata e Trump duhet të zhvendosë fokusin e saj në Azi dhe sigurinë e atdheut janë të sinqerta.

Ndërsa nuk janë marrë vendime, administrata Trump ka diskutuar reduktimet e mundshme të trupave në Evropë, ku aktualisht ndodhen rreth 80 mijë personel amerikan.

Zyrtarët amerikanë thanë se kandidati i ardhshëm i pritur nga SHBA-të për pozicionet e Komandantit Suprem të Forcave Aleate për Evropën (SACEUR) dhe Komandës Evropiane të SHBA-ve (EUCOM) është Gjenerali Lejtnant i Forcave Ajrore Alexus Grynkewich.

Pozicioni i SACEUR-it, i cili mbikëqyr të gjitha operacionet e NATO-s në Evropë, është mbajtur nga një gjeneral amerikan që nga krijimi i tij pas Luftës së Dytë Botërore. Gjenerali i Ushtrisë Amerikane Dwight D. Eisenhower u bë SACEUR i parë i Aleancës në vitin 1951.