U arrestua pasi i mori 700 euro të burgosurit për leje, GJKKO lë në arrest shtëpie shefin e IEVP-së Lushnjë

Gjykata e Posaçme (GJKKO) ka lënë sot në “arrest shtëpie” shefin e regjimit të Brendshëm në IEVP Lushnjë, Irakli Leka, pasi merrte rryshfet për t’iu dhënë leje të burgosurve që të dilnin nga qelia për disa ditë.

Ky i fundit u arrestua me 16 shtator me urdhër të SPAK për veprën penale “Korrupsioni pasiv i personave që ushtrojnë funksione publike”, pasi u kap duke marrë këmbim të lejes së përkohëshme për të burgosurit.

Leka, i cili mbante postin e Shefit të Regjimit të Brendshëm në burgun e Lushnjës, u denoncua me zë dhe figurë në emisionin Stop, se merrte 700 euro nga një i burgosur, për ti dhënë atij 5 ditë leje për të dalë nga qelia. Po ashtu drejtoria e Burgjeve njofton se me Urdhër të Drejtorit të Përgjithshëm është pezulluar nga detyra drejtori dhe nëndrejtori i institucionit si dhe është përjashtuar nga radhët e Policisë së Burgjeve punonjësi i dyshuar për korrupsion pasiv.

Në bashkëpunim me SPAK, u bë e mundur arrestimi i Lekës, vetëm pas 30 minutash nga transmetimi i emisionit.