Ultimatumi i Trump/ Reuters: Putin nuk do nënshtrohet, nuk i jep fund luftës

Presidenti rus Vladimir Putin nuk ka gjasa të nënshtrohet përballë ultimatumit të sanksioneve qtë paralajmëruara nga nga Presidenti i SHBA-së Donald Trump, që skadon këtë të premte.

Trump ka kërcënuar se do ta godasë Rusinë me sanksione të reja dhe do të vendosë tarifa 100% për vendet që blejnë naftën e saj, nga të cilat më të mëdhatë janë Kina dhe India, nëse Putini nuk pranon një armëpushim në luftën e Rusisë në Ukrainë .

Vendosmëria e Putinit për të vijuar nxitet nga bindja e tij se Rusia po fiton dhe nga skepticizmi se sanksione të tjera të SHBA-së do të kenë një ndikim të madh pas valëve të njëpasnjëshme të ndëshkimeve ekonomike gjatë 3 viteve e gjysmë të luftës, sipas tre burimeve të njohura me diskutimet në Kremlin.

Udhëheqësi rus nuk dëshiron ta zemërojë Trumpin dhe e kupton se mund të jetë duke e refuzuar një shans për të përmirësuar marrëdhëniet me Uashingtonin dhe Perëndimin, por qëllimet e tij të luftës kanë përparësi, thanë dy nga burimet.

Qëllimi i Putinit është të pushtojë plotësisht rajonet ukrainase të Donetskut, Luhanskut, Zaporizhzhisë dhe Khersonit, të cilat Rusia i ka pretenduar si të vetat, dhe më pas të flasë për një marrëveshje paqeje, tha një nga burimet.

“Nëse Putini do të ishte në gjendje të pushtonte plotësisht ato katër rajone që ai i ka pretenduar për Rusinë, ai mund të pretendonte se lufta e tij në Ukrainë i kishte arritur objektivat e tij”, tha James Rodgers, autor i librit që do të dalë së shpejti “Kthimi i Rusisë”.

Procesi aktual i bisedimeve, në të cilin negociatorët rusë dhe ukrainasë janë takuar tre herë që nga maji, ishte një përpjekje nga Moska për të bindur Trumpin se Putini nuk po e refuzonte paqen, tha burimi i parë, duke shtuar se bisedimet nuk kishin substancë të vërtetë përveç diskutimeve mbi shkëmbimet humanitare.

Rusia thotë se është serioze në lidhje me arritjen e një paqeje afatgjatë në negociata, por se procesi është i ndërlikuar sepse qëndrimet e të dy palëve janë shumë të ndryshme. Putin javën e kaluar i përshkroi bisedimet si pozitive.

Kërkesat e deklaruara të Moskës përfshijnë një tërheqje të plotë të Ukrainës nga katër rajonet dhe pranimin nga Kievi të statusit neutral dhe kufizimeve në madhësinë e ushtrisë së saj, kërkesa të refuzuara nga Ukraina.

Në një shenjë se mund të ketë ende një mundësi për të arritur një marrëveshje para afatit të caktuar, i dërguari special i Trump, Steve Ëitkoff, pritet të vizitojë Rusinë këtë javë , pas një përshkallëzimi të retorikës midis Trump dhe Moskës mbi rreziqet e një lufte bërthamore.

“Presidenti Trump dëshiron të ndalojë vrasjet, prandaj po u shet armë të prodhuara në Amerikë anëtarëve të NATO-s dhe po e kërcënon Putinin me tarifa dhe sanksione të ashpra nëse nuk pranon një armëpushim”, tha zëdhënësja e Shtëpisë së Bardhë, Anna Kelly, në përgjigje të një kërkese për koment.

Kremlini nuk iu përgjigj menjëherë një kërkese për koment për këtë histori. Të gjitha burimet folën me Reuters në kushte anonimiteti për shkak të ndjeshmërisë së situatës.

Trump, i cili në të kaluarën e ka lavdëruar Putinin dhe ka ofruar mundësinë e marrëveshjeve fitimprurëse biznesi midis dy vendeve të tyre, kohët e fundit ka shprehur padurim në rritje me presidentin rus. Ai është ankuar për ato që i quajti “budallallëqe” të Putinit dhe e përshkroi bombardimin e pamëshirshëm të Kievit dhe qyteteve të tjera ukrainase nga Rusia si “të neveritshëm”.

Kremlini ka thënë se i ka vënë re deklaratat e Trumpit, por ka refuzuar t’u përgjigjet atyre.