Vëllezër hipokritë, ç’do të bëhet me 21 janarin?

Nga Pëllumb Kulla

Ka numra të mallkuar, numra fatprerë, numra ters.

Në shumë ngrehina dhe hotele kati i trembëdhjetë nuk ekziston. Ai është aty, përmbi të dymbëdhjetin, por quhet i katërmbëdhjetë. Kjo gjë vihet re në shumë vende të botës.

Në Shqipëri është një datë e zezë, një datë turpi, një datë hipokrizie… Është një datë që nuk duhet të zihet në gojë. Ajo ose duhet ngjyer e zezë nëpër kalendarë, ose duhet fshirë.
Kjo datë është data e sotme, 21 janari.

Shqiptarët pas njëzetës duhet të kalojnë më njëzetedy janar. Ngaqë në atë ditën në mes, katër vetë janë vrarë me duar në xhepa. Atë ditë një urdhër, ca ushtarë të armatosur, ca pushtetare, kanë vrarë katër njerëz që mbanin duart paqësisht në xhepa.

21 janari shqiptar duhet të mbetet i urryer në jetë të jetëve!.Është i nënti 21 janar radhazi, që unë shkruaj për këtë ditë të zezë dhe nënvizoj, se asnjëri prej atyre të vrarëve nuk është farefisi im, por sejcili prej tyre më dhemb si të ishin vëllezërit e mij. E nuk do të më dhembnin po të qe se dikush nuk do të kish urdhëruar pushkatarët, që ata të katër, të rronin jo më tej se 21 janar 2011.

Në këtë vend janë vrarë me mijëra e mijëra të pafajshëm, janë, zhdukur, mbytur e varur padrejtësisht, mijëra e mijëra njerëz të urtë, gojë-ëmbël dhe që nuk patën shtypur një mizë. Diktaturave dhe regjimeve gjakatare ua kemi vënë përsipër ato mëkate.

Por të rënët e 21 janarit janë vrarë në një qiell që u duk i kthjelltë, në një kohë të deklaruar si demokraci, në një shtet me ligje. Ata i vrau dhe po i mban të vrarë e të nëpërkëmbur një shoqëri njerëzore, më hipokritja e tëra kohëve dhe e tërë shekujve.

Asnjë nuk është dënuar për atë urdhër, për ata plumba, për ato dredhime, për ato premtime. Asnjë prijës i këtij vendi nuk ka kërkuar gjyq, asnjë gjykatës nuk është marrë me atë gjykim e në gjithë këta vjet, pēr atë faj madhor.

Sot e kaqë vjet 21 janarin e presim, si të tëra ditët e motit, por nuk duhet të jetë kështu. Atë ditë ne duhet ta kalonim me sy përdhé.

Turp, turp, turp! Turp e mallkim në jetë të jetëve!Politikanë, qeveritarë e vëllezër hipokritë, qofshim të mallkuar në jetë të jetëve!