Vetëm 8 minuta/ Kurti u drejtohet serbëve të Kosovës për dinarin

Në një adresim 8-minutësh në gjuhën serbe, kryeministri i Kosovës, Albin Kurti, u ka bërë thirrje serbëve të Kosovës që të hapin llogari të reja bankare në euro për shkak të rregullores së Bankës Qendrore të Kosovës, dhe akuzoi qeveritë e kaluara se e kanë lënë popullin pa përkujdesje e nën ekspozimin e bandave krimanale në pjesën veriore të vendit.

“Lufta, dhe më pas politika e gabuar e politikanëve që ishin në krye të shtetit, e lanë popullin të varfër dhe të ekspozuar ndaj bandave kriminale, teksa kujdeseshin për jetën e tyre luksoze dhe të atyre që bashkëpunuan me ta”

-Deklaroi kryeministri i Kosoves

Ai theksoi sërish se rregullorja e BQK-së për pagesat me para të gatshme që hyri në fuqi më 1 shkurt të këtij viti nuk i referohet ndalimit të dinarit serb, porse synon të formalizojë pagesat dhe procedurat lidhur me dinarin, ndërsa garantoi se rregullorja nuk e ndalon Serbinë që të ndihmojë financiarisht qytetarët e komunitetit serb në Kosovë.

“Çdo gjë tjetër është propagandë e rreme që synon krijimin e tensioneve etnike. Rregullorja e re siguron ligjshmërinë dhe transparencën e parave të importuara në Kosovë, bazuar në kushtetutën dhe politikën monetare të Bashkimit Evropian”

-potencoi Albin Kurti, duke shtuar se deri tani, mënyra e futjes dhe transportit të parave përtej kufijve midis Kosovës dhe Serbisë u mundësonte grupeve kriminale që operonin në pjesën veriore të Kosovës të banuar me shumicë  serbe, të merrnin para të importuara ilegalisht, duke forcuar ndikimin e tyre mbi popullin, duke frikësuar masat dhe duke inkurajuar kriminelët.

Ai përmendi faktin se më shumë se 33 mijë pjesëtarë të komunitetit serb marrin pensione nga Kosova, rreth 2205 familje marrin ndihmë sociale, rreth 4244 familje marrin ndihmë për fëmijë dhe 1372 familje marrin ndihmë për gratë lehona dhe nënat me fëmijë – gjithçka, sipas kreut të ekzekutivit kosovar, bëhet përmes llogarisë bankare të hapur në euro.

Në fund siguroi qytetarët nga radhët e komunitet serb që përmes fushatave informuese dhe lehtësuese, periudha trazitore për çështjen e dinarit të jetë sa më e lehtë, megjithëse shtoi se gjëja më e rëndësishme është të kuptohet dhe besohet se vendosja e shtetit ligjor është e pashmangshme, ndërsa dërgimi i parave përmes transaksioneve bankare është i pakompromis.