Vetëvrasja që tronditi Moskën, a ishte ministri i Putinit i përfshirë në një skandal korrupsioni në Kursk?

Starovoit u shkarkua më herët sot nga Presidenti Vladimir Putin dhe kreu vetëvrasje disa orë më vonë, tha Komiteti Hetues Rus. “Trupi i ish-Ministrit të Transportit rus, Roman Vladimirovich Starovoit, u gjet sot në makinën e tij, me një plagë nga arma e zjarrit”, tha Komiteti Hetues, duke shtuar se “hipoteza kryesore (e shkakut të vdekjes së tij) është vetëvrasja”.

Dekreti presidencial që shkarkonte Starovoit – i publikuar më herët sot – nuk dha asnjë arsye për shkarkimin e ministrit pas vetëm një viti në detyrë, megjithëse analistët politikë nxituan të ngrinin mundësinë që ai të jetë shkarkuar në lidhje me një hetim për korrupsion në rajonin që ai dikur drejtonte.

Reuters nuk mundi t’i konfirmonte në mënyrë të pavarur akuzat, megjithëse një burim nga sektori i transportit, i cili nuk pranoi të identifikohej për shkak të ndjeshmërisë së çështjes, tha se pozicioni i Starovoit kishte qenë në pikëpyetje për muaj të tërë për shkak të të njëjtit skandal korrupsioni, i cili përqendrohej në fondet e destinuara për të forcuar kufirin e Rusisë me Ukrainën në rajonin e Kurskut.

Mediat ruse, duke cituar burime të zbatimit të ligjit, raportuan se një pistoletë që i përkiste Starovoit u gjet pranë trupit të tij në makinën e tij.

Përpara se të emërohej ministër i transportit në maj 2024, Starovoit ishte guvernator i rajonit të Kurskut për gati pesë vjet.

Tre muaj pasi u bë ministër i transportit, trupat ukrainase kaluan kufirin në Kursk në pushtimin më të madh të huaj të territorit rus që nga Lufta e Dytë Botërore dhe u zmbrapsën vetëm në fillim të këtij viti pas luftimeve të ashpra dhe shkatërrimeve të gjera.

Në prill të këtij viti, pasardhësi i Starovoit si guvernator, Alexei Smirnov, u akuzua për përvetësim të parave të destinuara për qëllime mbrojtjeje, mes akuzave se fondet e destinuara për mbrojtjen e kufirit ishin vjedhur, duke e lënë Kurskun më të prekshëm ndaj një sulmi ukrainas.

I pyetur më herët sot nga gazetarët nëse shkarkimi i tij do të thotë që Putini kishte humbur besimin tek Starovoit mbi Kurskun, zëdhënësi i Kremlinit, Dmitry Peskov, tha se “humbja e besimit përmendet nëse ka humbje besimi”, duke shtuar se “nuk ka një formulim të tillë në dekretin (e Kremlinit)”.

Shkarkimi i Starovoty vjen në një kohë sfidash të rëndësishme për sektorin e transportit, ndërsa lufta në Ukrainë vazhdon për të katërtin vit radhazi.

Sektori i aviacionit të Rusisë po përballet me mungesë pjesësh këmbimi dhe Hekurudhat Ruse, punëdhënësi më i madh i vendit, po përballet me kostot e larta të normës së rritur të interesit – të nevojshme për të frenuar inflacionin e lartë të përkeqësuar nga lufta. Kremlini njoftoi se Andrei Nikitin, një ish-guvernator i rajonit të Novgorodit, ishte emëruar ministër i transportit në detyrë dhe publikoi foto të tij duke shtrënguar duart me Putinin në Kremlin.

I pyetur në lidhje me largimin e papritur të Starovoit dhe emërimin e shpejtë të Nikitin, zëdhënësi i Kremlinit, Dmitry Peskov, tha: “Aktualisht, sipas mendimit të presidentit, kualifikimet profesionale dhe përvoja e Andrei Nikitin do të ndihmojnë më së miri në sigurimin që ky shërbim, të cilin presidenti e quajti jashtëzakonisht të rëndësishëm, të përmbushë detyrat dhe funksionet e tij.”

Dy burime nga industria e transportit, të cilat kërkuan të mos identifikoheshin, thanë se planet për të zëvendësuar Starovoit me Nikitin ishin në proces përpara Forumit Ekonomik Ndërkombëtar të muajit të kaluar në Shën Petersburg.

Ministria e Transportit nuk pranoi të komentonte.

Në takimin e tij me Putinin, Nikitin foli për detyrën e madhe të dixhitalizimit të industrisë ruse të transportit, në një përpjekje për të zvogëluar barrierat ndaj mallrave dhe për të siguruar rrjedhën më të lehtë ndërkufitare të mallrave.

Disa muaj pasi Starovoit la rolin e tij si guvernator i rajonit të Kurskut, trupat ukrainase pushtuan Kurskun nga kufiri, ndërsa Kievi nisi pushtimin më të madh të huaj të territorit rus që nga Lufta e Dytë Botërore. Forcat ukrainase u dëbuan nga Kursku në fillim të këtij viti.

Disa zyrtarë rajonalë në Kursk u arrestuan më pas me akuza për abuzim me pushtetin. Në prill të këtij viti, pasardhësi i Starovoit si guvernator, Alexei Smirnov, u akuzua për përvetësim të parave të destinuara për qëllime mbrojtjeje.

Një burim i tretë në industrinë e transportit tha se pozicioni i Starovoit kishte qenë në pikëpyetje për muaj të tërë, jo konkretisht për çështjet e transportit, por për skandalet e korrupsionit në Kursk.

Reuters nuk ishte në gjendje ta konfirmonte në mënyrë të pavarur këtë pretendim.