Viti i Ri interviston Ramën, Kim, Metën dhe Saliun

Nga Viktor Malaj

“Gjuha politike përpunohet në mënyrë të tillë që t’i bëjë gënjeshtrat gë tingëllojnë si të vërteta dhe vrasjet të respektueshme” – Xhorxh Oruell

Viti 2023 vendosi që, përpara hyrjes në “zyrën” e vet, t’i intervistojë disa nga protagonistët politikë në Shqipëri dhe, sigurisht, e filloi me Kryeministrin.

Viti i Ri: Zoti Rama, cilat kanë qenë arritjet tuaja më të veçanta dhe më të mëdha gjatë vitit 2022 ?

1. Rama: Sigurisht që afrimi me Evropën, Samiti i përbashkët BE-Ballkani Perëndimor në Tiranë dhe përmbyllja e ndërtimit të banesave për familjet e dëmtuara nga tërmeti i vitit 2019 qëndrojnë në krye, por unë mund t’ju përmend edhe dhjetëra, në mos qindra arritje të tjera të padukshme…

Viti i Ri: Jo, faleminderit. Jam i informuar që ju keni aftësinë të mbani fjalime maratonë dhe, madje, të bëni humor në dasmë dhe në mort, por desha t’ju pyes: a e konsideroni ju arritje faktin që dy ministra të kabinetit tuaj ndodhen në burg dhe, ka shumë të ngjarë që edhe gjatë “mandatit” tim dymbëdhjetë mujor të përfundojnë edhe disa të tjerë në burg, si p.sh. ai mësuesi i anglishtes që ju i besuat Ministrinë e Financave, të Ekonomisë dhe administrimin e fondeve të dhuruara nga vendet e tjera për ndreqjen e pasojave të tërmetit të nëntorit 2019 ?

1. Rama: Shiko, unë i caktoj njerëzit në detyra të larta shtetërore bazuar në aftësitë dhe kontributet e tyre, sidomos në aftësitë e tyre për të bërë çfarë iu them unë dhe si dua unë. Nëse ata veprojnë ndryshe, në të sëmbës të venë.

Viti i Ri: Cilat nga thënie tuajat më të vërteta dhe të arrira mund të veçoni për vitin 2022?

1. Rama: Të gjitha thëniet e mia janë të vërteta dhe të arrira, si nga ana stilistike ashtu edhe nga përmbajtja e tyre sepse, siç e dini, unë jam nga antikomunistët e parë dhe më të rreptë në Shqipëri, dhe antikomunistët thonë e bëjnë vetëm gjëra të vërteta dhe të drejta. Por, unë mund të veçoj njoftimin e bërë kudo në Evropë se Shqipëria deri në vitin 1990, që u shfaqa unë në skenën politike, ka qenë si Afganistani dhe Koreja e Veriut e Evropës. Gjithashtu, mund të përmend thënien tjetër se unë nuk mbaj përgjegjësi pse disa nga bashkëpunëtorët e mi në qeverisje mbushin xhepat e tyre me dardhë dhe mollë pas shpinës sime.

Viti i Ri: Domethënë, ju nuk mbani përgjegjësi për përzgjedhjen e tyre? Mos është dashur që ata t’i mbushnin xhepat me “dardhë dhe mollë” përpara syve tuaj dhe jo mbas shpinës tuaj?

1. Rama: Siç e dini, demokracia që ne ndërtojmë ka në bazë transparencën dhe nuk i duron veprimet pas shpinës. Merr o vëlla, por më trego edhe mua që po merr! Kur i kam zgjedhur për poste shtetërore ata ishin të ndershëm, por jeta evoluon, njerëzit ndryshojnë. Nga të mirë, bëhen të këqij dhe anasjelltas. Nuk e di a ju kanë treguar për një ish-ministër të opozitës aktuale, i quajtur R. Bode. Kur ishte në qeverisjet e S. Berishës nuk la gjë pa bërë dhe përflitej shumë si gjahtar parash, mirëpo, kur erdhëm ne në pushtet ai evoluoi dhe u bë i ndershëm, prandaj e vendosa anëtar të bordit drejtues të Bankës së Shqipërisë, ku merr një rrogë marramendëse dhe ka mundësi të përfitojë edhe “bonuse”.

Viti i Ri: Unë i kam fjalët të shkurtra. Gjatë mandatit tim ke dy rrugë: Ose na shpjego qartë e prerë faktin nëse Shqipëria e para 1990 ishte si Afganistani apo si Koreja e Veriut, sepse nuk mund të ishte si të dyja njëherësh, ose ik. Na shpjego, gjithashtu, pse kaq shumë bashkëpunëtorë tuajt po na dalin hajna dhe të korruptuar, ose ik futu në rresht pas tyre. Kaq!

Tani e ka radhën kryetari i Foltores për t’u intervistuar.

Viti i Ri: Zoti Berisha, cilat kanë qenë arritjet dhe sukseset tuaja më të mëdha gjatë vitit 2022?

1. Berisha: Shiko, unë kam gjithmonë vetëm arritje dhe suksese, fitore dhe vetëm fitore. Por, sot do të përmend vetëm disa. Së pari, unë arrita t’ia rimarr partinë birit tim politik, por plëngprishës, Lulzim Bashës, i cili bashkëpunonte me kriminelin E. Rama për ta mbajtur atë më gjatë në pushtet. Së dyti, arrita që me lopata, sëpata, kazma dhe trungje prej hekuri t’i thyej dyert e SHQUP-it, të futem brenda dhe të riulem në karrigen e kryetarit të PD-së. Oh, sa i due dhe i adhuroj unë karriget! Së treti, ne zhvilluem primaret, për herë të parë në histori dhe kjo tregon që ne jemi demokratë të kulluem…

Viti i Ri: Mjaft! E di se mund të numërosh me qindra arritje e fitore, pasi më kanë treguar se ti, edhe humbjet e dështimet i konsideron dhe i shpall fitore e suksese. Tani, dua të di nëse ti i konsideron fitore përçarjen e PD-së, marrjen e statusit non-grata edhe nga Britania e Madhe, si dhe grushtin që të shembi si thes me…, ashtu si nuk më lejohet ta them, në asfalt gjatë protestës më të fundit në Tiranë?

1. Berisha: Shiqo, shoku Enver na ka pas mësue se jeta asht luftë, por luftë që duhet fitue. Edhe unë do ta fitoj këtë luftë me soroistat, ramistat, vuçiçistat dhe istat e tjerë. Të gjitha këto mynxyra i ka sajue Edvin Kristaq Rama, krimineli më i madh i Shqipërisë, sigurisht pas E. Hoxhës…

Viti i Ri: Kam dëgjuar për broçkullat e tua dhe për faktin se nuk iu përgjigjesh kurrë pyetjeve të bëra, por thua ato gjëra që ti beson se të shërbejnë. Tani, më trego pak disa nga thëniet e tua më të vërteta dhe të drejta gjatë vitit 2022.

1. Berisha: Unë kam aq shumë thënie të vërteta dhe të drejta sa që e kam të vështirë t’i mbaj mend, por po ju përmend disa. Kështu, shpallja ime non-grata nga SHBA dhe Britania e Madhe mbetet vepër dhe lobim i Edi Ramës dhe Xhorxh Sorosit. Kjo nuk ka asnjë diskutim, thjesht dhe vetëm sepse kështu them unë. Nga ana tjetër, unë kam pohue me qindra herë se Edi Rama është armiku më i madh i PD-së, Shqipërisë, Kosovës, shqiptarëve dhe, madje krejt Ballkanit dhe Evropës, është hajdut, vrasës, drogaxhi, i korruptue dhe autori i vërtetë i grushtimit të dështue kundër meje por…

Viti i Ri: Ju marr vesh mirë, por doja t’ju pyesja edhe…

2022. Berisha: Jo, mos më ndërprisni ju lutem sepse kam për t’iu tregue thënien time më brilante të vitit 2022. Unë kam shpall botërisht se i kam pas tregue një francezi para 40 vitesh se, ashtu si për A. Kamynë, edhe për mue qëndron thënia se “Midis nënës time dhe të vërtetës, unë zgjedh të vërtetën”.

Viti i Ri: Domethënë, ju keni zgjedhur të vërtetën edhe kur keni thënë se Fatos Nano ishte hajdut dhe vrasës i A. Hajdarit, se Ilir Meta është trafikant droge, armësh, fëmijësh dhe femrash dhe se ai dhe Monika kanë hapur dy varre pas Malit të Dajtit, apo se vrasjet e 21 janarit 2011 i kishin bërë vetë demonstruesit etj. Dhe më pastaj, atëherë dhe tani keni lidhur miqësi dhe aleancë me Nanon e Metën? A nuk mendoni se e keni shitur shumë lirë nënën tuaj të ndjerë?

1. Berisha: Shiqo, unë nënën e shes por jo pushtetin, më falni, desha të them të vërtetën.

Viti i Ri: Përfundimisht, gjatë mandatit tim nuk do të ketë vend për ty derisa të bëhesh burrë dhe t’iu pohosh gjithë shqiptarëve se statuset e tua non-grata, si politikan i korruptuar, sundues i drejtësisë dhe minues i demokracisë, nuk kanë kurrfarë lidhjeje me E. Ramën e Xh. Sorosin por janë thjesht dhe vetëm vendime të qeverive amerikane dhe britanike të bazuara mbi vëzhgimet, studimet dhe përgjimet që të kanë bërë tash tridhjetë vjet. More vesh?

Le të hyjë tani kryetari i Partisë së Lekut, domethënë të Lirisë, sepse nuk ka liri pa para.

Viti i Ri: Zoti Meta, a mund të na tregoni pak arritjet tuaja gjatë vitit që po ikën?

I Meta: Kam disa arritje, por po përmend pak prej tyre. Unë ika nga President i vendit, pra i gjithë shqiptarëve dhe u ribëra president i partisë që përfaqëson sot 4 përqind të elektoratit, por që në zgjedhjet e ardhshme do të rritet në 40%. Ia rrëmbeva këtë parti gruas time, Monikës pasi ajo tregoi se ishte e paaftë për atë post dhe ia ndryshova emrin nga Lëvizja Socialiste për Integrim në Partia e Lirisë sepse ju duhet të dini se ajo që iu mungon më shumë shqiptarëve sot është liria, të cilën e ka shtypur i biri i Kristaq Ramës, ky qen bir qeni. Pastaj, së bashku me z. Berisha, luftëtarin më të madh kundër korrupsionit dhe demokratin shembullor të Evropës kemi bërë një protestë në Tiranë me pjesëmarrjen e qindra mijëra shqiptarëve. Ju e dini se zerot janë falas dhe mund të shtosh sa të duash pas njëshit.

Viti i Ri: Po thëniet tuaja më të mençura, të vërteta dhe të drejta cilat kanë qenë?

1. Meta: Nuk di cilën të veçoj më parë, por po ju them disa prej tyre: Drejtësia e re, domethënë drejtësia që po sjell Reforma në Drejtësi, është antikushtetuese dhe duhet një përmbysje politike që të rivendoset drejtësia e pavarur, pra drejtësia që ishte në kohën e sundimit tim dhe të z. Berisha; unë kam marrëdhënie të shkëlqyera me SHBA-në; nuk e dua pushtetin për vete, por për t’ia kthyer popullit; Sali Berisha, sa më shumë plaket, aq më demokrat bëhet. Ai është një legjendë, me kontribute të jashtëzakonshme në historinë e vendit tonë… në luftën kundër korrupsionit dhe rivendosjen e vlerave të demokracisë dhe lirisë; Edi Rama është autori i sulmit mbi Berishën në 6 dhjetor; unë kam lindur për të bërë revolucione dhe përmbysje…

Viti i Ri: Domethënë ju thoni se keni marrëdhënie të shkëlqyera me SHBA-në dhe Anglinë, besoni se ata, krejt gabimisht dhe padrejtësisht, e kanë shpallur non-grata z. Berisha dhe, ndërsa ata e kanë shpallur minues të demokracisë dhe të përfshirë në korrupsion gjigant, ju e shpallni legjendë dhe luftëtar të lirisë, demokracisë dhe kundër korrupsionit?!!!

1. Meta: Mos doni prova për konkluzionet dhe vlerësimet e mija? Pse, pak ju duket ju mbrojtja që më bëri mua në vitin 2012 kur u kapa me zë e figurë duke planifikuar grabitjen e 7% të fondeve të buxhetit të shtetit, apo qëndrimet e drejta të z. Berisha në 1997, shtator 1998, si dhe pas vrasjeve të 21 janarit 2011? Në fund të fundit, secili ka kriteret dhe parimet e veta morale dhe demokratike dhe, mbi bazën e këtyre kritereve e parimeve bën edhe vlerësimet e veta.

Viti i Ri: Në daç të mos përfundosh tek Sajmir Tahiri dhe Lefter Koka, vërja gishtin kokës dhe tregoji popullit shqiptar qartë dhe prerë: Ke marrëdhënie të shkëlqyera me SHBA-në apo marrëdhënie të tilla që ata janë gati të të vrasin pas Malit të Dajtit, siç ke thënë dikur? Të dyja nuk qëndrojnë. Gjithashtu, nëse nuk do të përfundosh keq, mos përdor dhe mos i shit popullit shqiptar parime dhe kritere të tjera për moralin, demokracinë dhe luftën kundër korrupsionit nga ato që njeh gjithë bota!

Në fund, u intervistua ambasadorja e SHBA-së në Tiranë, znj. Yuri Kim.

Viti i Ri: Zonja Kim, cilat kanë qenë arritjet tuaja kryesore gjatë vitit 2022?

Yuri Kim: Mendoj se kemi pasur shumë arritje dhe së bashku me popullin shqiptar, një popull i mrekullueshëm ky, kemi bërë hapa përpara. Arritëm që z. Berisha ta shpallte non-grata edhe Britania e Madhe dhe, shpresoj, se shumë shpejt këtë do ta bëjnë edhe qeveri të tjera të Evropës Perëndimore. Gjithashtu, kemi bërë përparime në vazhdimin e Reformës në Drejtësi. Për këtë qëllim unë shkova vetë disa herë për të takuar gjyqtarë e prokurorë dhe, sidomos, mora pjesë në procesin e zgjedhjes së kryetarit të SPAK-ut.

Viti i Ri: Po mirë, a nuk mendoni se kështu po cenoni pavarësinë dhe paanshmërinë e sistemit juridik shqiptar?

Yuri Kim: Shiko, unë shkova atje thjesht për t’iu folur atyre për rëndësinë e procesit dhe jo për t’iu treguar për cilin të votojnë. Pastaj, ju duhet ta dini se Reforma në Drejtësi është konceptuar dhe sponsorizuar prej SHBA-së dhe, rrjedhimisht, ne shqetësohemi për fatin e saj dhe, herë pas here, dukemi aty.

Viti i Ri: Domethënë, ju nuk mund t’iu flisnit nga larg për rëndësinë e procesit, meqë ata s’e dinin, por duhej të ishit aty? Veç kësaj, ju besoni se kush koncepton dhe sponsorizon reformën, duhet edhe të ketë pushtet mbi Drejtësinë?

Yuri Kim: Ju thashë edhe një herë. Ne mund të flisnim nga larg për rëndësinë e procesit të zgjedhjes por kur je i pranishëm ka ndikim psikologjik. Siç thotë populli shqiptar, të cilin e duam shumë, “syri, syrin e thyen”.

Viti i Ri: Po thëniet tuaja më pikante gjatë vitit 2022 cilat janë?

Yuri Kim: Kam disa por po veçoj ato që Shqipëria tani është e pavarur ndërsa gjatë diktaturës ishte e varur politikisht. Gjithashtu, para pak ditësh pohova se tani Shqipëria ka një mbrojtje solide dhe të pathyeshme e jo si dikur. Këto arritje në fushën e mbrojtjes kanë qenë të paimagjinueshme dikur, madje edhe E. Hoxha tani rrotullohet në varr kur merr vesh nivelin e lartë të mbrojtjes shqiptare.

Viti i Ri: Pra, ju mendoni se atëherë kur Shqipëria ishte e mbyllur dhe kishte shkëputur marrëdhëniet me superfuqitë ishte e varur, ndërsa tani që thuajse të gjitha proceset juridike, politike dhe ekonomike ia drejtojnë të tjerët është e pavarur? Nga konkluzionet tuaja del se tani që ushtria shqiptare është e specializuar vetëm në çështjet e Mbrojtjes Civile, pa avionë, tanke e raketa, është shumë më e fortë se atëherë kur kishte jo vetëm këto, por edhe 40 mijë oficerë e ushtarë dhe rreth 200 mijë rezervistë. Tani po e kuptoj se shkaku i tërmetit të vitit 2019 do të kenë qenë lëkundjet që kanë shkaktuar rrotullimet e Hoxhës në varr.

Yuri Kim: Ne kemi parimin e njohur që kush varet prej nesh është i pavarur dhe kush s’varet prej nesh mbetet i varur. Kjo duhet të jetë e qartë, si parim universal.

Viti i Ri: Nëse doni t’ju lejoj të qëndroni më gjatë në Shqipëri, duhet të kontribuoni që z. Berisha të marrë medaljet non-grata edhe nga vendet e tjera perëndimore. Gjithashtu, Reformën në Drejtësi duhet ta shpejtoni dhe të flisni më pak e të veproni më shumë. Good luck!