Vonesa e ndihmës ushtarake/ Biden i kërkon falje Zelenskyt

Presidenti amerikan Joe Biden i ka kërkuar falje homologut të tij Volodymyr Zelensky për vonesat në ndihmën ushtarake për Ukrainën dhe ka premtuar 225 milionë dollarë në mbështetje.

Dyshja u takuan për bisedime në Paris, një ditë pasi të dy morën pjesë në përkujtimet e 80-vjetorit të zbarkimit të Ditës D në Normandi, Francë. Departamenti i Mbrojtjes i SHBA tha se paketa e re e ndihmës do të përfshijë municione dhe raketa kundërajrore. Rusia nisi një pushtim të plotë të Ukrainës në shkurt 2022.

Biden tha se vonesat e mëparshme në ndihmë ishin shkaktuar nga disa republikanë në Kongres, por përsëriti mbështetjen e SHBA për Ukrainën.

“Shtetet e Bashkuara do të qëndrojnë me ju”, i tha Biden Zelenskyt. “Ju nuk jeni përulur. Ju nuk jeni dorëzuar. Ju vazhdoni të luftoni në një mënyrë që është thjesht e jashtëzakonshme, thjesht e jashtëzakonshme.”

Në përgjigje, Zelensky theksoi rëndësinë e marrëdhënieve të vendit të tij me SHBA-në, duke thënë se ishte thelbësore në luftën kundër Rusisë: “Ne llogarisim në mbështetjen tuaj të vazhdueshme për të qëndruar me ne krah për krah”.