Vota e emigrantëve/ 8 ditë nga nisja e regjistrimeve, 33 mijë persona aplikojnë

Një javë më parë u hap për të gjithë diasporën shqiptare procesi i regjistrimit për zgjedhjet parlamentare të 11 majit. Sipas të dhënave të publikuara në faqen zyrtare të Komisionit Qendror Zgjedhorm deri më tani kanë aplikuar 32, 910 emigrantë dhe janë shqyrtuar 18,698 aplikime. Nga këto aplikime janë miratuar vetëm 11,847, ndërsa 6851 prej tyre janë refuzuar.

Emigrantëve që iu janë refuzuar aplikimet kanë të drejtë të riaplikojnë deri në datën e përfundimit të afatit, më 4 mars. Interesi më i madh për të votuar është shfaqur nga shqiptarët që jetojnë në Itali me 30% të aplikimeve, ndjekur nga Greqia, Gjermania, SHBA dhe Britania e Madhe.

Po ashtu emigrantët meshkuj dominojnë dukshëm në krahasim me femrat në interesin e shfaqur për të votuar, ku 66% janë meshkuj dhe 34% femra. Grupmosha më e interesuar për të votuar është ajo nga 26-35 vjeç, e ndjekur nga ajo 36-45 vjeç, ndërsa grupmosha me më pak aplikime është ajo e 18 deri 25 vjeç.

Në Platformën Elektronike të Regjistrimit janë regjistruar emigrantë nga 28 vende në botë. Për t’u regjistruar duhet të futeni në faqen e KQZ-së dhe të klikojnë në seksionin “votues nga jashtë”. Pasi të klikojnë duhet që të vazhdojnë me procedurat dhe kërkesat e Komisionit të Zgjedhjeve. Pasi aplikimi të ketë përfunduar, brenda 5 ditëve, KQZ u kthen përgjigje brenda 5 ditëve duke njoftuar nëse aplikimi i tyre është pranuar, ose jo. Nëse aplikimi është i suksesshëm, KQZ do t’u dërgojë emigrantëve fletën e votimit me postë. Pasi vullneti të jetë nënshkruar në letër, fleta e votimit do të kthehet sërish me postë në Shqipëri për t’u numëruar më 11 maj.