Vrasja në Durrës/ Vëllai i autorit: U arratisëm për t’i ikur hakmarrjes

Pas zbardhjes së vrasjes së Branko Shkozës, situata në familjen e Majlind Habibit është kritike. Vëllai i autorit tha se pasi u zbulua se Majlindi qëndronte pas vrasjes, ata kanë mbyllur derën e shtëpisë dhe janë larguar nga frika e hakmarrjes. Ilir Habibi tha  se ai është larguar nga Durrësi së bashku me familjen e tij dhe ka rrëfyer për jetën e tij në arrati.

“Na ra si bombë. Unë isha në punë, nuk e kuptova as vetë se si na erdhi kjo gjë. Atë natë që e kam marrë vesh, direkt kam njoftuar xhaxhain tim të më marrë nusen dhe kalamajt se i kisha në gjumë. Kam marrë rrugët, kam fjetur në autostradë se po binte shi. Të nesërmen kam marrë një hotel që të fus fëmijët brenda. Unë jam i pafajshëm dhe fëmijët e mi po ashtu. Nëse Majlindi ka bërë krimin të marrë dënimin”, tha ai.

Më tej, i vëllai shtoi se autori është një person impulsiv dhe kërkon që të zbardhet ngjarja e plotë. Ai tha se nëse Majlindi është fajtor të marrë dënimin që meriton. Më tej, Iliri shton se ai ka frikë për fëmijët e tij dhe për këtë arsye është larguar nga shtëpia.

“Ne kemi ecur me mendimin se ai e ka pranuar atje dhe ka mbaruar çdo gjë. Kur ai ka thënë se më kanë rrahur dhe torturuar, atëhere unë jam i detyruar, me aq mundësi sa kam, që të zbardhim çështjen, se edhe unë jam në hall. Ai është një njeri impulsiv dhe ndikohet lehtë nga presioni. Të zbardhet çështja, a janë një autor apo disa. Flitet që ka pasur bashkëpunëtorë. Nëse Majlindi im është fajtor të marrë dënimin në maksimum. Nuk ka dalë i ati i tij, të thotë nuk kam gjë me ty, hajde në shtëpinë tënde. Unë kam frikë, ishim në punë fëmijët në shkollë, ishim në rregull. U shkatërruam. Mua më vjen keq për Brankon, se jemi rritur bashkë. Më vjen keq për Brankon. I shpreh ngushëllimet familjes”, u shpreh vëllai i autorit.

Në dëshminë e tij paraprake, Habibi deklaroi se Shkoza i ngacmonte gruan dhe kur i kërkoi që të mos e bënte më, ky i fundit e talli. Ai u shpreh se nuk kishte si qëllim ta vriste dhe se është penduar për krimin. Shkoza, u raportua i zhdukur nga babai i tij më datë 4 dhjetor, pasi kishte humbur kontaktet me të birin prej datës 2 dhjetor. Shoku i tij Majlind Habibi dyshohet se e ka shtyrë me qëllim 33-vjeçarin drejt kanalit të ujërave të zeza për t’i marrë jetën. Pasi hodhi Branko Shkozën nga ura për motive të dobëta, autori i dyshuar raportohet se fshehu krimin, duke mos treguar vrasjen. Të dy të rinjtë, me njohje mes tyre, kanë qenë të dehur momentin e konfliktit, kurse shkak dyshohet se është bërë ngacmimi i gruas së autorit nga viktima, por hetimet janë ende aktive për rastin. Pas ngjarjes, i dyshuari e ka fshehur krimin, duke mos treguar, derisa trupi u gjet pas tre ditësh kërkime. /tch