Vrasje apo vetëvrasje/ Gjendet e vdekur bashkëpunëtorja e ngushtë e Putinit

Misteri rrethon vdekjen e një bashkëpunëtoreje të ngushtë të Vladimir Putin. Një zyrtare në sektorin e mbrojtjes të presidentit rus është gjetur e vdekur, pasi besohet se ka rënë nga kati i 16-të i një ndërtese nga një lartësi prej gati 48 metrash, duke lënë pas një sërë dokumentesh.

Marina Yankina, 58 vjeçe, u gjet e vdekur nga një kalimtar në hyrje të ndërtesës në Shën Petersburg, pasi raportohet se ra nga dritarja.

Komiteti Hetimor Rus dhe shërbimi për shtyp i Qarkut Ushtarak Perëndimor “Fontanka” konfirmuan vdekjen e saj dhe po hetojnë shkakun.

Sipas Daily Mail, Yankina ishte një nga figurat kryesore në financimin e luftës në Ukrainë. Ajo ishte në krye të departamentit të mbështetjes financiare të Ministrisë së Mbrojtjes për Qarkun Ushtarak Perëndimor, i cili është i përfshirë ngushtë në pushtimin e Ukrainës.

Vdekja e saj misterioze i shtohet listës tashmë të gjatë të vdekjeve zyrtare gjatë sundimit të gjatë të Putinit. Vetëm javën e kaluar, gjeneralmajor Vladimir Makarov, i shkarkuar së fundmi nga Putin, u gjet i vdekur në rrethana misterioze. Po ashtu dhjetëra biznesmenë rusë janë gjetur të vdekur që nga fillimi i vitit 2022 në rrethana të pashpjegueshme. Shumica janë mbyllur te ‘dosja vetëvrasje’.