Connect with us

Aktualitet

Vriten dy pjesëtarë stafi të ambasadës izraelite në Uashington

Dy punonjës të ambasadës izraelite u qëlluan për vdekje jashtë Muzeut Hebraik në Uashington.

Konfirmimi vjen nga Sekretarja e Sigurisë Kombëtare e SHBA-së, Kristi Noem.

“Dy punonjës të ambasadës izraelite u vranë pa kuptim pranë Muzeut Hebraik në Uashington DC.

Po hetojmë për të mbledhur më shumë informacion për të ndarë. Lutemi për familjet e viktimave. Do ta nxjerrim autorin para drejtësisë”, shkroi ajo në X,

Sipas zyrtarëve që folën për mediat lokale, një burrë u pa duke ecur pranë Muzeut Hebraik në Uashington përpara se të hapte zjarr, duke goditur një burrë dhe një grua.

I dyshuari thuhet gjithashtu se bërtiti “Liri për Palestinën” gjatë arrestimit të tij.

Lajmi i perditesura

Autori i dyshuar, Elias Rodriguez, 30 vjeç, nga Çikago, u arrestua pak minuta pas sulmit. Sipas dëshmitarëve, ai qëndronte jashtë muzeut në mënyrë të dyshimtë dhe hapi zjarr ndaj një grupi prej katër personash që po dilnin nga ndërtesa, duke lënë të vdekur dy prej tyre.

 

Rodriguez u përpoq të hynte brenda muzeut, por u ndalua nga personeli i sigurisë. Gjatë arrestimit, ai bërtiste slogane si “Liri për Palestinën”, duke ngritur dyshime për motivim politik ose ideologjik pas ngjarjes.

Reagime zyrtare dhe masa sigurie

Ambasada izraelite konfirmoi bashkëpunimin me autoritetet për hetimin, duke sqaruar se ambasadori nuk ndodhej në vendngjarje në momentin e sulmit.

Zyra Rajonale e FBI-së në Uashington njoftoi se nuk ka kërcënim të mëtejshëm për publikun dhe se është angazhuar në hetimin e rastit.

Shërbimet e sigurisë amerikane janë vënë në gatishmëri të shtuar pas ngjarjes.

Reagime ndërkombëtare dhe kombëtare

Ted Deutch, drejtor ekzekutiv i Komitetit Amerikan Hebraik, shprehu tronditjen e tij: “Jemi të shkatërruar nga ky akt i papërshkrueshëm dhune. Zemrat tona janë me familjet e viktimave.”

Ambasadori izraelit në OKB, Danny Danon, e cilësoi sulmin si “akt të neveritshëm terrorizmi antisemit”.

Presidenti amerikan, Donald Trump, në një reagim në Truth Social, dënoi ashpër sulmin:

“Këto vrasje të tmerrshme, me sa duket të motivuara nga antisemitizmi, duhet të marrin fund tani! Urrejtja dhe radikalizimi nuk kanë vend në Shtetet e Bashkuara.”

Muzeu Hebraik, simbol i trashëgimisë hebraike në SHBA

Ngjarja ndodhi shumë pranë zyrës rajonale të FBI-së. Muzeu Hebraik i Uashingtonit është një institucion i përkushtuar ndaj historisë dhe kontributit të komunitetit hebraik në rajon.

Hetimet vazhdojnë, ndërsa komuniteti hebraik dhe ai diplomatik janë në zi pas kësaj ngjarjeje të rëndë.

Advertisement