Vuçiç angazhon Radoiçiçin në Kosovë, kërkon të fitojë shumicën absolute

“Për të siguruar “mbështetjen absolute” të serbëve të Kosovës në zgjedhjet e ardhshme parlamentare, Partia Progresive Serbe dhe Lista Serbe angazhuan të gjitha resurset shtetërore, qendrat shëndetësore, institucionet arsimore deri dhe qendrat për punë sociale” – kështu shkruan Radio Gorazdevaci.

Sipas këtij mediumi, Milan Radoiçic, përgjegjës për sulmin e 24 shtatorit kundër Policisë së Kosovës, i cili u shpall në kërkim nga Interpoli, është angazhuar në këtë mision, duke takuar përfaqësuesit e serbëve të Kosovës në Rashkë në gjysmën e dytë të nëntorit.

Disa burime kanë konfirmuar për Radio Gorazhdecin se në takimin me kryenegociatorin serb, Peter Petkovic në fund të nëntorit në Rashkë janë ftuar vetëm zyrtarët e Partisë Progresive Serbe dhe se përveç takimit me Petkovicin, dyshohet se ka pasur një takim të veçantë me Milan Radoiçicin.

Mediumi, po ashtu shkruan se po punësohet njerëz pa konkurs dhe se po ushtrohet presion ndaj serbëve për te mbështetur partinë e Vuçicit në zgjedhjet parlamentare të 17 dhjetorit.

Nga e ashtuquajtura zyrë për Kosovën në qeverinë serbe nuk i kanë kthyer përgjigje këtij mediumi në lidhje me takimin e përfaqësuesve serbë me Petkovicin dhe Radoiçicin.

Zgjedhjet parlamentare dhe lokale të Serbisë janë caktuar për në 17 dhjetor, gjatë të cilave serbët e Kosovës do të mund të votojnë në Rashkë, Tutin, Bujanoc dhe Kurshumli. Ky është procesi i dytë zgjedhor i organizuar nga Serbia, në të cilin serbët nga Kosova duket se nuk do të votojnë në Kosovë. Për këtë, kryeministri i Kosovës, Albin Kurti ka kërkuar që Serbia të kërkojë një marrëveshje paraprakisht.